雖然前晚睇波睇到好夜先瞓，趙飛雲噚日仍晨早去到股票行，皆因上周五美股似乎唔多夠力，港股有機會回吐。恒指早段升至11301已開始腳軟，趙飛雲上午收市前於0.225元沽出恒指輪9045，0.53元沽出長實輪9063。
港股午市跌幅果然擴大，恒指跌112點，收11139。噚日沽貨獲利，並非睇淡港股前景，只係窩輪波幅大，雖然係短線調整，亦要把握機會高沽低買。尾市已經心思思想撈番隻恒指輪9045，皆因恒指已跌近第一個支持位11104，不過考慮到美股噚晚可能會跌，今日有機會買平啲，所以暫時唔郁手。
單從技術走勢睇，恒指就算跌穿11104，11000重要關口唔易失守（以收市計），如果真係大幅跌穿，港股今次升勢將破壞，要重新考慮係咪外圍或本地出現重大利淡因素。長實（001）早段升至74.50元回吐，收73.25元，72元附近有支持，長實輪9063可考慮撈番。
噚日睇到一段報道，話中國證監5月對內地上市公司進行審查，消息對中資股可能有影響。
趙飛雲