所謂「行行出狀元」，呢句老話其實好勵志。最近好多酒樓食肆結業，業內瀰漫一片悲觀情緒，不過，八方昨日就聽聞徐維均又買樓。
徐維均係邊個？就係有富豪飯堂之稱嘅福臨門酒家嘅老闆。福記二十年代開始由到會做起，招呼過唔少商賈名流；徐維均子承父業，三十四年間由小廚師搖身變成白手興家嘅富豪之一，事業更上層樓，堪稱廚界榜樣。
講番間屋，佢上個月以二千七百幾萬買入山頂加列山道二十九號LaHacienda的七號屋，面積三千二百平方呎，有靚海景，連雙車位，每呎作價八千五百五十六元，而現在住在加列山道的名人計有簡福飴、梁智鴻同周梁淑怡等，個個非富則貴。
至於徐老闆現時住緊嘅中半山愛都大廈三座三千三百平方呎大宅，早於八二年購入，當時第一手買不過三百幾萬，雖然𠵱家市值已經超過二千萬，但據代理界老友透露，業主唔等錢使，暫時無意出售。
E-mail：