港股噚日受滙豐（005）與中移動（941）兩股拖累下跌112點，收報11139。
中移動ARPU跌勢放緩本屬好消息，早市表現都算硬朗，只可惜外圍下午傳出愛立信將見紅，而且可能供股集資，股價大跌，嚇到投資者力沽電訊股，相信呢個禮拜電訊股都好難有運行，好彩大戶期指好倉底仍未拆，後市應該重有得去。
光通信（603）復牌後即刻俾幾路莊家牌買盤推高，阿虎原本諗住喺前收市價0.12元附近收集，點知連呢個機會都冇埋。光通信全日升22%，以0.147元收市，成交達1.56億元。尾段重見到金利豐與國泰君安大買盤入市，後市似乎想跌都難，睇個勢似乎必破0.15元，下一關可見0.20元。
其實光通信只係用9000萬元購買兩個天然氣項目權益，冇咩特別。不過，黑客話佢好戲陸續有來（當然包括壓軸戲抽水），大家可以繼續睇。
益安國際（082）噚日無端端炒高20%，收報0.85元，不過成交疏落，只得372萬元。原來最近有個炒家叫人入貨，由於個市冇咩特別消息，經紀又冇咩生意，所以都有啲人小注怡情跟玩兩手，當係捧場又好，止吓手痕都好。不過有人話，此股本周公布業績，到時應該有好嘢公布。
華利資源（1215）大股東完成減持35億股，每股3仙，套現成億銀，可算消除咗好多市場疑慮，聽講呢手貨好似落入有心人手上，準備炒幾轉，不過公司基本因素唔吸引。
阿 虎