全港最高豪宅紅磡海名軒過去一個多星期都賣得幾好，呎價最高近一萬元，但昨日有買家出到每方呎10500元想買一座70樓A或B單位，發展商竟然話唔賣，唔通有錢都唔想賺？長實董事趙國雄透露，因為1座高層單位已經所餘無幾，但今個禮拜就有批來自溫州、南京、上海同寧波嘅富豪嚟參觀，到時若果只係畀啲低層單位佢哋睇就唔掂，所以老細話要保留高層單位待客。
呢班內地富豪，個個都唔嘢小，身家最少都有成十億，買樓都係為咗排場，所以長實都不敢怠慢。聽講會安排佢哋入住江主席曾入住嘅紅磡海逸酒店。
趙國雄話海名軒冇乜做過宣傳，但因樓盤有意申請加入健力士世界紀錄大全，成為全球最高住宅嘅報道，俾內地傳媒轉載，所以令到個盤響內地名氣大增，甚至有內地富豪來電話要求落嚟睇樓。佢重話已經買咗海名軒嘅買家都有錢賺，好似一座頂層兩個複式單位（由蔡志明以八千萬元買入），現時肯轉手已可賺一千萬。
E-mail：