早兩日，唔知各位有無留意到報紙廣告，話越野路華旗下嘅Freelander，賣價竟然唔使20萬，足足比原來嘅價錢平成10萬呢！及後經亞Mark查證，原來代理手頭上重有少量2001年製造嘅Freelander存貨，為咗清貨不惜割價求售囉！
至於係咪抵買，若然你係RV車嘅發燒友的話，咁就真係唔使諗咁多，即時去Showroom落訂喇！事關部Freelander用上一台2.5公升V6引擎，輸出夠氣夠力之餘，佢重有埋一套+/-半自動波箱，用作日常代步既有型又有款，兼且表現出色之外，用佢嚟攀爬山澗石道，以Freelander穩妥嘅陣式車架，加埋一套附有多個先進電子模式嘅恒式四輪驅動系統，表現真係綽綽有餘㗎！
𠵱家部三門版Freelander售價為19萬9千幾，而五門版就分別有標準版嘅22萬8千，同埋真皮版嘅23萬8千；各位有興趣嘅朋友，就真係要行快一步去Showroom睇吓重有無存貨剩，如果唔係俾人買晒就唔好啦！