名模Danielle前晚獨自往灣仔看首映，自羅兆輝公開她與外籍男子親暱照後，她多番以性感打扮到蘭桂坊消遣，又手持香煙兼講粗口。但Danielle前晚卻忽然以清純打扮出席首映禮，莫非想為形象補鑊？
模Danielle、Rosemary、向海嵐、吳積遜、江欣燕夫婦、陳昭昭、鍾麗淇和陳霽平等，前晚在灣仔會展出席荷李活新片《忘我奇緣》首映。
Danielle自被羅兆輝公開她和一名外籍男子的親暱照後，表現有點失常，除經常往蘭桂坊蒲，又煲煙和爆粗，日前還電了一頭鬈髮。但前晚Danielle卻回復清純的面貌，對記者的提問一概不回應，其多面的性格可謂難以捉摸。
昭昭前晚穿上吊帶小背心到場，十分性感，她說：「呢排我犯太歲好黑，唔見咗幾個電話，頭先出門口又發現唔見咗隻古董表，隻表係媽咪買畀我嘅，好有紀念價值。我最近花咗三百幾萬買咗泓景臺一個近千呎嘅單位，我會復出拍戲，要搵多啲錢供樓。」
向海嵐即將跟佘詩曼（阿佘）合作無綫新劇《帝女花》，問她可會怕跟是非多多的阿佘拍檔，向海嵐說：「我哋之前喺《七姊妹》合作過，冇問題，我哋係同事關係，私下冇聯絡，但喺公司有打招呼。我唔會特別羡慕佢拍電視同電影，有機會撞到好劇本同啱時間咪接拍。」
採訪：馮美茵
攝影：陳偉權