昨日趙飛雲入馬場搏殺，原本有個好開始，可惜第2場隻「饗客」俾人告甩，連贏位得而復失，跟住就唔多順手。戲肉跑女皇盃，趙飛雲捧榮大董場，可惜「奧運精神」名副其實，只係在於參與，又係日本馬威晒，睇見支「藥膏」旗喺馬會大螢光幕中飄揚，認真刺眼，跟住夜晚新聞話首相小泉又去參拜靖國神社，更加氣頂。
講起日本又諗起南韓，南韓97年金融風暴較香港受創深，但復原則較快，韓股今年屬亞洲區表現最佳股市之一，而港股則係今年亞洲表現最差嘅股市之一，上個禮拜港股做番好些少，有大行分析員以「Everydoghasitsday」來形容港股表現。趙飛雲真係好有感觸，唔通港股真係淪落成生滋狗冇人吼？不過上周港股升市3個交易日，恒指成交接近百億元，反映開始有資金流入。熱錢周圍搵食，由賺錢嘅股市回吐，流向未炒熱嘅市場係必然現象，如果本周港股成交持續向上，則恒指第2季升回12000之上機會大增。
美股上周五個別發展，整體形勢仍偏穩，不過恒指若上試11400受阻，趙飛雲會先沽出手上嘅恒指輪9045及長實輪9063食胡，候低再補番。
趙飛雲