上星期有兩次三T巨獎，我哋可以發達嘅機會，以前左丁山都講過，碰到呢啲場合，馬場零舍多人，馬會就笑騎騎，因為丁財兩旺，投注額大增之故。標準馬迷如馬主N、馬主L、馬主H、左丁山等一班人，就會皺眉頭，因為人太多，買飛唔易，而且好多非馬迷入場碰運氣，特別嘈吵（佢哋傾陳奕迅受傷、謝霆鋒跑車多過講馬），影響標準馬迷度馬情緒。就算喺馬主廂房、會員包廂，情況都會一樣。
馬主H上星期三喺沙田會所四樓旺灣樓就勞氣咯。平時雙邊投注，嗰度只有五成幾上座率，夥計侍應雖然少，仍然招呼周到。
上星期三就滿到瀉晒，夥計人數冇增加，同平時一樣，於是嗌碗雲吞麵都要等一個鐘頭（而且非常難食），標準晚餐食完主菜就冇甜品咖啡奉上（要催幾次，一個鐘頭後至到）。唉，馬會催谷三T投注就搏晒命，做到加零一，但臨場就懶理，散工唔請多幾個，點招呼啲會員呀！馬主H想話嘈啲夥計，但只見佢哋個個做到面青兼面黑，索晒氣，反而同情咗佢哋㖭。
好多平時唔見嘅稀客，嗰晚都喺旺灣樓蒲頭，唔少係九龍、新界嘅廠家老闆，其中一位名人就係佐丹奴總裁劉國權。佢對馬主H講：「趁高興同朋友入嚟玩吓，一世仔第二次咋。」三T巨獎吸引力真係驚人，居然連劉國權都吸引埋，如果個個禮拜三T都冇人中，香港真會全民瘋狂㗎。