張學友前晚喺上海體育場舉行「張學友世界音樂之旅演唱會」，吸引咗成八萬人嚟捧場。原定演唱會喺夜晚七點半開始，點知因為太多觀眾嘅關係，淨係入場已經搞到遲咗半個鐘，認真巴閉。
而最奇嘅就係，上海前日不停咁落雨，點知學友嗰晚一開咪，啲雨停咗，就連學友演出時，都要同老天爺講聲多謝。嗰晚學友愈唱愈興奮，觀眾要求學友安哥，學友亦好想再唱落去，可惜主辦單位認為太夜，要終止演唱會，班觀眾惟有好冇癮咁離開。
今次學友舉行演唱會，主辦單位特登喺演唱會舉行前搞咗個牛奶義賣，將所有收益捐畀上海少年兒童活動基金會，真係一舉兩得。
梁朝偉同安雅傳出緋聞，其實佢兩個早於上年十月，已經喺內地認識。兩個人好投契，返到嚟香港一樣有來往，可能因為劉嘉玲又忙，冇乜時間陪偉仔啦！
不過上個月開始偉仔同安雅已經少咗聯絡，偉仔就仍然住喺嘉玲MayTower屋企，睇嚟佢兩個仍然鍾意同居而各自各精采嘅生活方式。
早幾日喺Chanel中環店搞咗個珠寶預展，邀請咗一向幫襯開Chanel嘅阿太出席。馮仁昭個老友亦有去捧場，重咁啱遇見傅明憲同孫名翠。馮仁昭個老友話傅明憲入去唔夠半個鐘，大有收穫，佢用十六萬幾買咗隻據聞係全港獨有嘅太陽形狀鑽石戒指，真係夠晒闊綽。
呢排是非纏身嘅謝霆鋒，前排走咗去佐敦嘅錄音室，重同陳曉東前後腳喺錄音室出現。但奇就奇在霆鋒平日唔係喺嗰度錄音，而且嗰晚佢都淨係同錄音室裏面啲人傾偈同打機。雖然霆鋒確實冇同東東見過面，但馮仁昭就諗極都唔明，霆鋒去錄音室究竟做啲乜？
張栢芝前幾日失驚無神揸住架開篷平治載細佬去西貢，報紙嗰日都有報道㗎。馮仁昭就有個朋友嗰日咁啱喺西貢，見到栢芝細佬張豪龍落車，原來係佢約咗朋友喺嗰度等，張豪龍啲朋友同佢講唔好意思，麻煩到栢芝，點知張豪龍好囂張咁讚家姐飛車技術犀利，可以撇甩記者，重講到眉飛色舞。
李克勤舊年年頭出嘅大碟《飛花》，同之後推出嘅演唱會VCD、DVD同卡拉OK碟，總銷量超過十萬張，馮仁昭聽聞克勤係舊年環球最賺錢嘅歌手。而另一個唱片賣得嘅係鋼琴高手李雲迪，銷量亦過咗五萬張，所以環球唱片嘅員工繼舊年九月獲公司分紅後，多得「雙李」帶挈，呢個月尾會再有多一次分紅。
周潤發去咗加拿大拍西片都有個幾月，早兩日馮仁昭同發嫂通過電話，佢話加拿大好凍，每朝早都要為老公發哥準備幾個暖袋，畀佢帶埋去開工。發嫂話下個月拍完部戲就會返香港，不過十月發哥又要去三藩市同尼古拉斯基治合作，拍吳宇森嗰部講鐵路工人嘅新片。
馮仁昭早幾日喺將軍澳新都城一間西餐廳食嘢，咁啱遇見滕麗名同魏駿傑兩個喺度撐枱腳。原來魏駿傑都幾大男人，佢食餐包嘅時候，竟然要女朋友搽埋牛油畀佢先至肯食。雖然滕麗名好似小女人咁體貼，但佢食煙時嗰副爛撻撻嘅模樣，真係叫人不敢恭維。