真係要恭喜紐卡素前鋒舒利亞，佢終於打破魔咒，入咗佢喺超聯第二百球，睇嚟老舒佢今屆重有入球，最終受惠梗係紐記啦。
舒利亞喺上個禮拜六對查爾頓射入一粒後，佢喺超聯嘅入球數字終於去到二百，佢老人家喺超聯經已踢咗十季，咁即係話平均每季入二十球，名副其實係「一季入二十球嘅前鋒」。
記得奧雲入咗喺利物浦第九十九球後，等咗三個禮拜先去到一百大關；老舒喺入到第一百九十九球兩個禮拜多啲就入到第二百球，不過代價都幾大，上仗對打比郡，就踢到血流披面，重中途要離場，打不死精神換嚟嘅榮譽，我求大俠當然戥佢高興啦。但係有一個人重開心，之唔係紐記領隊卜比笠臣囉。
紐記家陣同車路士爭歐冠盃入場券，𠵱家比車仔多六分兼打少一場，加埋舒利亞咁弗，你話領隊卜比笠臣唔「合皮」就假。
曼聯嘅阿根廷中場華朗俾佢個國家隊隊友貝高斯踢爆，佢喺英格蘭原來一直做緊間諜，重收集咗好多關於世界盃分組賽同組對手英格蘭國家隊嘅情報。但係計我求大俠話，阿根廷家陣強成咁，連衞冕冠軍嘅法國都未驚過，所以就算華朗唔同佢哋報料，佢哋嘅贏面都較英格蘭高。
拜仁嘅德國中場艾芬保早排鬧啲德國人寧願攞救濟金，都唔去搵嘢做，搞到自己一身蟻，得罪人之餘重俾拜仁雪藏，唔畀佢喺上個禮拜六對柏林哈化場波上陣。我求大俠都知道艾芬保係個敢言嘅人，但如果佢再係咁麻煩，睇怕佢季尾同拜仁約滿後，下屆都幾難搵到班落。
利華古遜今屆喺主場一直表現出色同穩陣，點都諗唔到佢哋會喺上個禮拜六輸畀雲達不來梅一比二。或者佢哋喺歐冠盃八強淘汰咗利物浦後，個心雄咗，淨係諗住禮拜三對曼聯場歐冠盃四強首回合，加上又覺得攞梗聯賽錦標，冇將雲達不來梅放在眼內，結果咪輸波囉。
俗語話長江後浪推前浪，超音速對馬刺之前，好多人都以為出名防守好，專「恰」新人嘅披頓會玩謝馬刺新仔柏加；點知老貓燒鬚，成場波都守唔住佢，結果搞到隊波俾人大炒，而柏加重攞成二十一分；第一次打季後賽就咁掂，我求大俠真係佩服佩服。
英足總為咗令碧咸趕得切喺六月二號，幫英格蘭踢對瑞典場世盃首場分組賽，諗住用六千鎊買個氧氣箱畀佢瞓，加速佢嘅血液循環，令佢嘅腳傷快啲好番。我求大俠聽到後覺得好誇張，不過鬼叫碧咸對國家隊咁重要咩，如果話可以即刻醫好佢隻腳，我諗英足總使多多錢都制。