一直以德國寶馬3系為假想敵嘅豐田Altezza（即港版凌志IS200），自98年10月面世至今，一直廣受車迷追捧；然而，廠方早前加推配用3.0公升直6引擎嘅新版Altezza，仍無法超越現有3系嘅性能。
有見及此，豐田有計劃於明年（2003年）8月上旬，推出全新第2代Altezza車系，新車除造型變得成熟具房跑車風格外，最具突破性莫如拱起嘅頭冚兩旁，加有透氣柵格，以及車尾圓拱形一體式尾燈編排，予人有仿似瑪莎拉蒂3200GT嘅模樣。再者，新款Altezza或許會有三台新偈組合，除頂級3.0公升V6偈（260匹）外，重有2.5公升V6偈（250匹）及2.0公升型號供用家選擇。之不過，廠方重考慮為新車再添上一台3.5公升V6引擎，馬力輸出為330至350匹之間，以抗衡寶馬M3跑車嘛！