數碼影音：
率先測試富士中價機王　散發黑色魅力

富士在PMA中展示第三代SuperCCD時，同場重宣布推出三部配備SuperCCD嘅機種，而且分別走高、中、低檔市場。首部屬入門級嘅FinePixF601已於三月頭推出，到四月尾便輪到中價機S602登場，本報率先拿到一部S602樣辦機作測試，今日就為大家詳細分析呢部中價機王優劣之處。

記者、攝影：徐影龍

更出色之SuperCCD
S602係富士第二部採用新一代SuperCCD機種，基本感光像素為三百萬級，經SuperCCD獨有之八角形蜂巢式排列後，再將感光元件彼此間之空間計算出來，令相片輸出度提升一倍，達2,832×2,128，相當於六百萬像素效果，雖然只是計算出嚟，不過獨特排列令計算效果更為細緻準確，相片效果比傳統四邊形排列好得多。
S602同入門級F601雖然同樣採用第三代六百萬像素SuperCCD，但性能更超卓，單以全自動拍攝計，畫質仍高出一班，關鍵在於鏡頭設計。S602鏡頭口徑比F601大上數倍，集光率優勝得多，相片細緻度亦因此提高，喺充足陽光底下優劣立見。

噪訊抑制大改良
另一項改變係設有DaulSlot，兼容SmartMedia及CompactFlash，除可使用容量更大、價錢更平嘅CF卡外，重可兼容新出嘅1GBMicroDrive微型硬碟，就算以無壓縮嘅TIFF格式儲存(每張17MB)，都可收錄58張靚相。更放棄了專用鋰電池，改為更方便的四粒2A電，操作及儲存相片並冇因此而變慢。
最慢快門由3秒提升到15秒，黑暗環境需長時間曝光至啱，最驚喜係改良咗噪訊抑制，15秒長時間曝光下，幾乎搵唔到半點雜色噪訊，將SuperCCD最大缺點徹底消除！最高快門由1/1,000升至1/2,000，除可拍攝高速移動物件外，在猛烈陽光下，收細光圈至F11仍是曝光過度，提高快門可謂非常有效。ISO增加咗800同1,600，至啱拍攝演唱會等黑暗環境，不過解像度限制為1,280×960，最可惜係取消咗ISO100，同F601一樣為160。

手感操作俱佳
S602外形同舊機6900Z差不多，但手握位加大，令單手操控更穩定。其他按掣變化，最顯著係開關掣，改為S1PRO式連快門旋轉掣，微距拍攝掣改在機身左方，拍攝直度相時會較為不便。不過操作及菜單選項變化不大，舊有用戶毋須從頭適應。
S602保留6900Z受歡迎嘅功能，如多重曝光拍攝、AutoBracketing、九種白平衡等，最啱磨練進階拍攝技巧。輔助機能同樣設有對焦點放大確認、曝光鎖定、數碼式觀景窗等功能，若以手動對焦，更可透過緊急掣作即時自動對焦，毋須經常轉換對焦模式咁麻煩。

富士攝影器材
查詢電話：24063226