自從《星戰前傳1》被唔少人話劇情太悶兼渣渣兵犯眾憎之後，好多人都擔心《星球大戰前傳2之複製人侵略》會重蹈覆轍。幸好睇番啱啱到港嘅各種玩具，都加入唔少新元素，好似5大吸塑Figure之中，尤達首次執起激光劍最令Fans哄動。再加埋設計有型嘅一眾飛船，證明佐治魯卡斯下定決心，要省番靚星戰個招牌。
記者：張穎倫 攝影：周旭文、陳穎
承接上集故事，阿拿堅雖然飽受其他絕地武士反對，但在師傅奧比溫悉心栽培下，阿拿堅終成為一個出色嘅絕地武士。不過隨着不斷嘅戰鬥，師徒間嘅嫌隙卻愈嚟愈大。再加上，阿拿堅與皇后阿美達娜的姊弟戀情亦注定分手收場，正當阿拿堅失落之時，黑暗嘅力量亦同時向他招手，令他逐漸步向邪惡之途。電影將於5月16日美國、香港同步上映。
由主角阿拿堅率領嘅5大角色，有齊喺今集會出手戰鬥嘅尤達，捨身入魔嘅武士CountDooku，最多Fans嘅高級白兵CloneTrooper，以及初次登場嘅女捕快ZamWesell，肯定係今次4吋Figure中最受歡迎嘅一批。每個Figure都會有多種配件或特別玩法，嚟配合電影劇情，令玩家更加投入。當中尤達唔單止有飛碟坐，更會以「大能」將石塊拋起，將「大能」營造成藍色物質，絕對係星戰第一次。而大奸角Dooku，更會送埋引誘佢嘅DarthSidious人像㖭。
全套售價：$375（J&A）
今集最矚目嘅銀河捕快JangoFett為咗要追捕奧比溫，就乘坐呢架Slave1出擊。所以論火力，佢比JediStarFighter更強大好多。唔單止有4枚導向飛彈，更備有大量音速炸彈，足以將奧比溫打殘。外形雖然唔算好有型，但垂直飛行亦夠特別。
售價：$215（J&A）
唔少人都知主角阿拿堅飛車有一手，上一集更係賽車冠軍，但唔知點解佢嘅座駕Speeder，會有撞車玩法。每當車頭撞上硬物，引擎就會凹陷，車頭又會飛出碎片，簡直真嘅一樣，十分盞鬼。唔通今集阿拿堅會遇上交通意外？阿彌陀佛！
售價：$125(不連阿拿堅)（J&A）
奧比溫嘅座駕識變形，雖然奧比溫（Obi-Wan）有啲驚坐飛船，但身為絕地武士點都要有部傍吓身。而且佢部JediStarFighter更非常有型，唔止識發射飛彈，又有機械人仔Astromechdroid陪坐，更可變身飛機型、戰鬥型兩種模式，外形又有啲似神勇飛鷹俠嘅第三代鳳凰號，足以冧盡全球Fans。
售價：$175（J&A）
咪睇呢隻怪獸Reek個樣傻吓傻吓，其實佢係銀河聞名嘅兇殘怪獸，更擁有以一敵百嘅能力。據聞要勞動MaceWindu、ShaakTi、KitFisto等一大班絕地武士圍揪佢，先可以將佢制服，絕對唔嘢少。再加上星戰嘅怪獸一向都有唔少人捧場，有興趣就要及早入貨。
售價：$175（J&A）
＊以上星戰玩具將於明日正式發售。
今晚絕對係星戰迷嘅大日子，事關部分吸塑Figure將會喺今晚凌晨12:00優先發售，而且頭50位買家更會獲贈電影海報，並參加大抽獎。中獎者就可得到全港只得三隻嘅25周年銀樣黑武士特別版，eBay炒價現已高達美金$130，極之珍貴。
除咗普通版吸塑玩具之外，當然會有更多配件嘅Deluxe版。眾多Deluxe之中，就以奧比溫場景最有睇頭，皆因地台同奧比溫腳下都裝上磁石，再加埋發射器，只要一按掣就可將公仔彈上地台另一方，難度十分之高。
售價：$119.9（玩具反斗城）
作為星戰之中，Fans眾多嘅銀河捕快，絕對要裝備齊全，身手敏捷。化身吸塑Figure之後，仍有齊雷射槍、頭盔、飛彈等多款裝備，而且更有埋游繩，等你可以幫佢四圍吊，夠晒好玩。
售價：$79.9（玩具反斗城）
售賣地點：
J&A日美專門店（23988618）
旺角彌敦道570-572號基利商業大廈13樓1303室
玩具反斗城（28811728）
銅鑼灣皇室堡3樓全層