女皇盃盛事，馬場好熱鬧，差不多所有董事出齊，八方本來捧香港隊，買榮智健隻「奧運精神」，結果日本仔包辦一條Q，夾埋捧走千二萬獎金；頒獎之時，馬會高奏日本國歌，「榮進寶蹄」個日本馬主笑到合唔埋口，榮太子在後排就冇咩癮。八方一來輸錢，二來又碰正小泉昨天去拜神，更加唔高興；不過個日本騎師福永祐一又真係幾靚仔。
呢個女皇盃賽創於七五年，有三十多年歷史，九五年升格為國際賽，九九年起由愛彼錶贊助，回歸之後，馬會冇咗英皇兩字，但女皇盃照跑，亦係香港馬迷安心之事。
女皇盃輸錢，主席獎就執番些少。凌釗城隻「魅力之城」再下一城，額外得多八十萬獎金，聽講呢位馬主喜歡將獎金捐出做善事，係就抵佢贏。講起呢個獎，今次應該係李福深最後一次頒，明年，輪到夏佳理威。
（圖）「榮進寶蹄」個日本馬主領女皇盃時笑到合唔埋口，但「奧運精神」馬主榮太子就冇咩癮。
E-mail：