在中山發展雅居樂花園而打響名堂嘅雅居樂集團，廣州項目「廣州雅居樂花園」，即將在港推售，發展商今個禮拜四響廣州舉行開售儀式，重請埋廣州市領導剪綵，認真夠排場。
香港規劃師學會同中國城市規劃學會，今個禮拜六日，響深圳搞個「WTO與中國城市發展」研討會，有200幾個香港同內地嘅規劃師參加，出席嘅嘉賓好猛料，香港有行政會議召集人梁振英、規劃地政局局長曾俊華、立法會議員劉炳章、規劃署署長馮志強；內地有中國城市規劃學會常務副理事長周幹時，而建設部副部長同深圳市領導都可能出席。
至於講者就有渣打郭國全、瑞安王英偉、市建局林筱魯等。
房協馬鞍山曉峰灣畔終於有新動作，今日開放示範單位畀傳媒睇，出席有設計師高文安，高生當年幫長實樓盤做室內設計而廣為人知，今次幫房協做嘅室內設計會係點呢？
管理居屋物業稱王的新昌地產管理公司，近兩個多月又接咗5項合約，涉及992個單位。現時新昌管理嘅物業有122項，超過11萬個住宅單位同274萬方呎商場及工貿樓。
蘭西