別以為只有山旮旯地區才有平靚正美食，近在咫尺的鳳凰村日日都玩抵食嘉年華，主攻街坊客的飯店，特價菜式由朝煮到晚，海鮮、客飯、小食和點心，源源奉上，加上通宵營業，無論你是朝氣勃勃、日上三竿或披星戴月，都可隨時隨意享美食。
記者：楊一凡 攝影：楊錦文
如此夠派頭的椒鹽瀨尿蝦特價$25一碟，而且無限量供應，點解可以咁平？老闆娘豪爽地說：「有個親戚做海鮮嘛，益自己人，收平啲，貨色又靚啲。」每碟約十隻，堂食外賣同價。
每日上午11時至下午4時半，你可以$22享用鴨腿湯飯、勝瓜肉片湯飯及冬瓜粒湯飯，隨飯送你罐裝汽水一罐，一大鍋上的湯飯，分量足夠二人同享；誠意推薦鴨腿湯飯，滷水入味，上湯清甜，飯量十足，幫襯一餐，連Tea都慳番。晚上11時後更減至$20。
點心夠大件，款式又多，棉花雞、蝦餃、燒賣、雞紮和鳳爪固然有得你揀，就連難得一見的鵪鶉蛋燒賣、鴨腳紮、四寶雞紮、海鮮紮和百花鯪魚球也密密蒸，熱辣登場。食店全日不設加一，茶芥兩蚊位，學生免茶。晨早歎完茶，下午2時半至4時半繼續歎多餐。
電話：27264205
地址：黃大仙鳳凰村環鳳街28號地下