上個月底臨放假前，經紀陳同小初講過，話冷門股德信控股（758）大股東大手減持，短期內可能有動作，小初當時見隻股成交量唔係十分多，於是冇理到，但唔經唔覺股價由84仙去到上個星期五嘅90仙，係52周高位。
德信大老闆上月底以每股80仙減持2000萬股，佔已發行股本6.68%。至於批貨落喺咩人手上，經紀陳就話重了解緊。佢又話大老闆由於喺武漢朋友多，人脈關係良好，上面好似有新project搞緊。
咁樣就叫做炒作理由？小初就覺得唔多夠。經紀陳補充話，下個星期一公司出業績，可能係做嘢之時，不妨留意。
另外，冷門過德信嘅四海國際（120），無端白事以每股58仙，批咗900萬股新股，係已擴大股本嘅7.65%，但集資淨額只係500萬元咁大把。小初冇記錯嘅話，呢隻股喺市場上被傳放盤都傳咗好幾年，無端端低位批咁大手貨但要得咁少錢，睇落唔多尋常喎。
慕容小初