星期三下午，特首到立法會講高官問責制，立法會外企滿爭取留港權嘅人士。左丁山行近立法會去香港會赴午飯之約，碰到議員C，問佢：「點解要行路呀，私家車唔係可以停響立法會門口咩？」議員C話：「今日就咪搞咯，停低架車喺政府總部外，再行過嚟；今日唔知會唔會有推撞㗎。」議員C果然辦事細心，驚死啲示威人士衝動起嚟，與警察碰撞，殃及池魚，禍及議員嘅私家車。
入到香港會，主人家富豪Y寒暄之後，就問左丁山：「董生在午飯後講高官負責制，你點睇？」左丁山一時為之言塞，自己乜都唔知，點評論呀，我唔係劉兆佳教授噃，等政府宣布公開多啲資料先至有得講。
富豪Y不愧為長春藤名校畢業生，講嘢問嘢，句句到肉，絕不含糊，非常醒目。做到佢夥計，想蒙混過關嘅話，一定俾佢將軍到暈，好彩我哋係客人，客客氣氣就呃咗一餐。
呢幾年來，見得闊佬多，印象之中，呢啲真正成功人士（唔係靠炒股炒樓嘅暴發戶），數十年來靠實業發達，屹立不倒，多數有兩個特點。
其一就係言辭清晰，思路敏捷，而且一定好好禮貌，中小學程度，冇去過英美留學嘅，重更加好禮貌；其二就係個相好好睇，鼻哥一定長而筆直、高聳，人中長，下巴豐滿向上兜起。
左丁山唔係睇相佬，唔識睇相理論，不過見過唔少富豪?大學問家，歸納起嚟，先至有此一說啫。