近年，寶馬車廠動作多多，先後推出多款新車以吸引車迷；而繼全新7系豪華轎車及極受歡迎嘅MiniCooper之後，最近又傳出廠方將於2003年舉行嘅法蘭克福車展上，展出新一代5系四門版，而2004年亦會展出新5系嘅旅行車版。
從電腦模擬出嚟嘅相片中可以睇到，新5系嘅造型可謂與新款7系相近似，而圓渾嘅車身線條，望落重有少許似Coupe跑車，吸引度明顯較前提升不少；至於車廂布局方面，則相信會與現有5系型號相近，同樣以豪華配搭為主，另外重加入已應用於7系身上嘅i-Drive系統㖭。
而該消息又指出，廠方為抗衡多部已推出、或快將推出嘅新款跑車，故將會為新5系增加一台3.0公升直6bi-turbo引擎（馬力約380匹），同埋預期會係新M5所採用嘅一台5.5公升V10引擎（馬力約500匹）；同時又會備有2.2、2.5及3.0公升等引擎配搭供用家選擇，以迎合不同需要。有興趣嘅朋友，不妨拭目以待喇。