繼《老懵董》同《掃把頭》後，市面再度出現諷刺董伯伯嘅產品。有本地動畫創作人眼見現時經濟不景下民怨日增，諷刺特首同高官嘅漫畫賣個滿堂紅，於是喺噚日推出一套取名《董董樂園》嘅動畫VCD，分「你冧莊我冧檔」同「香港正苦」上、下兩集，每集一隻光碟賣三十幾蚊。
套動畫主要講董董自出任小島管理人一職以嚟，從未實踐許下嘅承諾及政策，直至推出新政策「霹靂無敵八萬五」……。除咗董董外，酷似董太同各高官、議員嘅人物都會粉墨登場。
出呢隻VCD嘅亞洲動畫多媒體有限公司創作總監謝繼昌同八方講，佢自己都係負資產，但推出呢套動畫純係商業考慮，因為佢以往做開代理日本動畫VCD嘅生意，呢幾年個市場開始萎縮，又見早排諷刺特首同高官嘅漫畫賣得，於是便搵嚟一班freelance製作人，搞出呢隻百分百香港製造嘅動畫光碟嚟。
佢強調，動畫諷刺政府政策，絕唔會作人身攻擊。
﹙圖﹚《董董樂園》嘅動畫VCD，希望藉諷董熱潮，賣過滿堂紅。
E-mail：