楊千嬅加入樂壇多年，但唱現場仍屢次失準，有人覺得她身為「唱家班」，就不應「甩嘴」，而千嬅亦勇於承認會為失準耿耿於懷，更斷言不會再重蹈覆轍。
楊： 我對自己好多演出都好滿意，但我都會為有時失準好唔開心，今年年頭嘅頒獎禮，我唱得唔好，唔開心咗好耐，冇人知我嗰日發燒到一百零一度，聲帶發炎，我連續趕戲好多日，你哋見唔到我瞌眼瞓嘅樣，我每次攞獎都好似執到金，但嗰晚真係好慘，唔忿氣㗎，咁多人睇到，但冇法啦，喺嚟緊嘅日子，我唔會畀自己再有咁嘅一日，人係應該不恥下問，我會繼續學唱歌。
記： 呢排你連續拍咗四部電影，係咪想做票房天后？
楊： 之前嘅《玉女添丁》同《新紮師妹》票房都OK，我自己覺得有啲撞棍，我冇諗過要去孭幾多票房，自己對電影認識唔深，淨係知拍時要投入，做票房天后會搞到自己有壓力，因為電影難掌握，觀眾嘅反應好難捉摸。
記： 你拍《新紮師妹》嗰陣時，同吳彥祖係咪撻着愛火花？
楊： 我係一個好難撻得着嘅人，所以我對呢啲新聞都好驚訝，乃念套戲票房過千萬，冇功都有勞，只係傳言話我追人，犧牲就大啲囉，哈哈！我同吳彥祖合作得好好，同佢再合作都冇所謂。