早前走勢極度牛皮、差唔多被各路炒家完全遺忘嘅即時科研（8119），終於喺上個禮拜郁番，重升返上去4毫樓上。雖然呢隻股仔同另一創業板公司衝浪平台（8178）都係開發Linux軟件，不過股價走勢就唔可以同日而語，單單睇今年年頭嘅表現，衝浪平台個價到上周五收市就已經足足升咗5成有多，不過即時科研喺同期就只有兩成五升幅，遠遠落後。
不過聽講公司最近開始發力攞生意，線人話，由於班大戶喺市場收集呢隻股仔已到尾聲，隨時一聲令下，就會開車。上個禮拜班大戶更四圍打鑼打鼓叫人買貨，坐定睇表演。不過買呢類股仔始終有風險，上唔上車自己諗清楚。
上個禮拜啱啱除權嘅光通數網（155），走勢都算唔錯，唔單止冇俾沽盤掟散個價，重喺上周五企喺兩仙水平報收。聽近日唔少行家評語，話呢隻股之前表現差到無倫，新老闆入股都對隻股仔冇乜用，有啲重同佢計數，話公司咁差嘅表現，重竟然夠膽向市場伸手。
雖然呢啲都係不變嘅事實，不過單單睇佢以前嘅表現就話新老闆唔掂，似乎唔係好公道。首先公司要點行，始終都係老闆話事，做財顧只可以純粹畀意見，所以伏勝覺得過去嘅失敗，做財顧未必要「負責」。另一方面，當日科技熱潮下，有邊間公司唔投資國內嘅電訊市場呀，之不過冇諗到國內嘅法規始終唔肯放人，結果所投資嘅項目才會泡湯。
所謂識英雄重英雄，伏勝一向都係非常佩服做財顧嘅行家，因為一隻股票究竟夠唔夠錢開新project，都係睇佢哋有幾本事。今次新老闆入主155後，憑佢嘅經驗相信可幫公司籌集足夠資本發展新業務，大家不妨畀多些少耐性，睇吓佢嘅真功夫再講啦。 伏勝