楊千嬅噚日連走兩場，佢先去香港仔運場，參加商台搞嘅「饑饉三十」開幕禮，然後又趕去九龍城廣場，聯同古天樂（古仔）一齊為新片《乾柴烈火》宣傳。千嬅同古仔喺電影宣傳活動上，除咗同fans玩遊戲，重搞咗個簽名會，吸引咗成三百個fans圍觀。
《乾》片首日開畫就有九十萬票房，古仔同千嬅都好開心，電影公司話票房到一千四百萬就請演員同工作人員去日本旅行，古仔話：「票房去到二千萬，我請大家去歐洲五日，包住宿同機票，如果衣食都包埋，我會破產。」不過千嬅就話會包大家伙食。
古仔話今日係佢阿爸七十大壽，佢同阿媽已經安排咗幫阿爸擺大壽，古仔話：「到時我會唱歌助興，如果唱《今期流行》，怕阿爸睇咗爆血管。」
另外，千嬅、黃貫中、張燊悅、黃伊汶同陳小春噚日參加「饑饉三十」，要捱餓三十個鐘頭，千嬅話：「我發咗誓唔會偷食，我唔係嗰啲詐諦嘅人，我重用《乾柴烈火》嘅票房做擔保。」
劉青雲同老婆郭藹明噚日拖住手喺銅鑼灣幫一間家具店剪綵，老闆見佢兩個咁恩愛，即刻送個BB公仔畀佢哋，重話希望佢哋快啲增添個新成員，可以再布置過間屋。
不過青雲就話早排見到張達明湊仔，幾個鐘頭餵一次奶，都唔明啲BB點解食得咁急，好彩青雲都冇嚇親，重話總之老婆有咗就公告天下。
陳琪噚日揸架平治E240房車，去烏溪沙青年新村拍新劇《絕世好爸》，佢話架車係佢老竇嘅。問佢怕唔怕俾人話佢忽然富貴？陳琪話：「唔怕，我爸爸做塑膠生意，架車係佢公司嘅。」佢架車度貼咗張馬會會員停車證，陳琪起初話係佢一位男性朋友嘅，後來又話自己畀錢入會，都幾奇怪。
有位落難男歌手，因為公司唔玩，搞到佢到𠵱家都冇得撈，聽講本來有幾間唱片公司搵過佢斟，但點知佢唔知時勢，繼續獅子開大口，開價五百萬。啲唱片公司聽到佢開呢個價即刻嚇窒，更可況呢位男歌手未到嗰個位。落難男歌手因為自抬身價，搞到𠵱家都未有着落，惟有繼續落難。
林峯前晚同無綫藝員劉嘉龍一齊蒲蘭桂坊，佢話同李彩樺合作嘅劇集《雲海玉弓緣》已經拍完，所以佢𠵱家休息緊，至於緋聞女友阿Rain，林峯話：「個劇拍完就算㗎啦，不過重有電話聯絡。」
黃伊汶（Dior）噚日擔任「adidas至cool型着大比拼」嘅評判，佢畀得最高分嘅就係冠軍嗰個貌似黃子華嘅癡情fans，Dior同馮仁昭話之前已經見過呢個fans，見佢上次攞唔到獎，今次喺台上又打觔斗又跳咁辛苦，真係唔畀獎佢都唔得。
有個被打入冷宮嘅玉女，近來個樣同氣質都由清純變為冶豔，聽講佢俾人落咗降頭。而落佢降嘅，聽講就係曾經好錫佢嘅上司，佢為咗要令呢位玉女貼貼服服，就搵人落降，令佢變成另一個人，𠵱家玉女真係好聽話，但就重俾公司雪緊。
朱慧珊噚日喺旺角新世紀廣場嘅「日日珠寶」，為亞視聽晚首播嘅新遊戲節目《群雄奪寶》試珠寶，順便幫個節目造勢。珠寶店會贊助一千萬首飾畀朱慧珊喺節目度戴，朱慧珊噚日重得到五萬蚊首飾做禮物。對於佢老友曾華倩同商人老公林肇基離婚，朱慧珊話：「佢係我最好嘅朋友，我知都唔會講，我哋日日都有通電話，我知華倩個人好開朗，佢呢段時間絕對開心愉快。」