民主黨少壯派同主流派的恩恩怨怨終於有個了斷，五十個少壯派前日拉隊過檔前綫，雖然搞到高層踢晒腳，但對兩派嚟講未嘗唔係一個解脫。
有個民主黨中委同八方講，今次有人快樂有人愁，有同少壯派一直有牙齒印的人，一聽見少壯派走人立刻話要請食飯，但主席李柱銘（馬丁）就成晚心情麻麻，事關佢一直想「感化」少壯派，等班兄弟唔好走，結果搞到佢主持個中委會開會開到好似拉牛上樹，開極開唔完。
後來馬丁走先，由副主席羅致光主持，羅致光喺九點開記者會之前，已經三扒兩撥開完會，搞到班中委鬼咁興奮拍晒手掌，以為終於可以走人，點知羅致光立即喝住佢哋，因為會場外面已經有記者到，萬一佢哋以為主流派拍掌慶祝少壯派走人，再大字標題咁寫，就真係水洗都唔清！
至於馬丁李，噚日一早就帶咗班年輕人上山植樹，唔知係咪想彌補一下同少壯派嘅關係呢？
﹙圖﹚民主黨主席李柱銘昨拋開煩惱，出席植樹活動輕鬆一下。
E-mail：