同鄭中基分手與人無尤
楊千嬅戥張柏芝陰功

十六個月前，楊千嬅與鄭中基分手，當時曾盛傳因張栢芝介入而導致。而近期栢芝又再捲入王菲與謝霆鋒的戀情。對於這位涉撬她牆腳的情敵，千嬅表示不願追想舊事，而且她從未憎恨栢芝。

【愛情篇】仍然關心鄭中基
行六年的楊千嬅，曾公開承認的男朋友只有鄭中基一個，但年前二人卻忽然分手，有傳聞指分手導火線全因張栢芝介入。
楊： 楊千嬅　 記： 記者
記： 張栢芝係咪曾經做咗你同鄭中基之間嘅第三者？
楊： 兩個人拍拖係會有好多外來因素，但主要睇根柢，𠵱家新聞（指栢芝介入霆鋒王菲戀情）風頭火勢，無謂加插啦。以我嘅case嚟講，有啲事過咗去犯不着再講，人與人之間相處係學問，無論喺乜嘢環境下，兩個人底子有問題，就會發生另一啲問題，喺嗰一剎那嘅困難，自己會唔知點解決，但未必係一件壞事，後生學識吓同人相處，EQ會有得着。

「栢芝？靚囉」
記： 話栢芝撬走鄭中基到底係咪真？
楊（沉思幾秒）：我冇親眼睇到，冇親耳聽到，唔會追想番，反正都唔係最重要嘅事。
記： 你同栢芝熟唔熟？
楊： 唔熟，我好少見到佢。
記： 你對栢芝有乜評價？會唔會憎栢芝？
楊： 靚囉，佢係有性格嘅人。我點解會憎佢？喺另一個角度睇，佢喺陰功位㗎，因為佢年紀細，要去面對咁多問題，其實幾難。
記： 每次鄭中基有負面消息，記者都搵你回應，你有乜感覺？
楊（大笑）：我應該簽佢，抽佢佣囉，我做緊Parco（黃栢高）做，我諗我冇權對任何人失望，自己都唔係一百分人

舊夢不須記
記： 你對鄭中基有冇恨意？
楊： 冇嘅，我重關心佢。
記： 鄭中基同你分手之後，傳過佢曾經向你提出復合？
楊： 大家成年人，唔需要刻意，要睇有冇緣分，發生一啲事又會帶嚟一啲問題，大家係朋友，𠵱家最舒服最冇壓力，我唔會嘥時間去諗唔知幾時發生嘅事。
記： 呢段情帶畀你嘅回憶，係咪痛苦多過開心？
楊： 呢段情令我學識同人相處，咁先至會長大嘅，所以我冇憎佢，有些少慶幸㖭。
撰文：朱芷瑩
攝影：馬啟然、陳慧安
協力：羅慧敏
髮型：Horace/04
化妝：KarryWong
場地提供：ISLANDSEAFOOD