前排搞到傳媒氹氹轉嘅「神童輝」羅兆輝，冇晒聲氣一輪，噚日又有佢嘅新聞。佢嗰間金匡企業噚日喺尖沙嘴帝苑同上海一家電機企業簽合作協議，但神童輝就冇現身，據金匡主席陳鴻業透露，原來羅兆輝同羅氏家族喺個幾月前已經退出金匡，完全冇再持有金匡嘅任何股份咯！
神童輝嘅好友章桂新Roger對八方話，羅生重休息緊同埋康復中；問到佢神童輝係咪需要搬離𠵱家住緊嘅地方，Roger就話：「我哋公司唔係不近人情嘅，會有六個月時間準備，佢或者去第二度休息，但去邊就未決定。」
Roger又話，羅兆輝呢排日日都留喺屋企睇電視，少出街，再冇吸食藥物，食咗醫生開嘅藥之後，人亦平靜咗。至於佢嘅生活費用，Roger話：「我諗佢未至於身無分文，佢自己有能力，雖然佢嘅經濟狀況係有少少問題，唔係短期可以解決，不過基本生活無問題，有屋企人照顧。」
﹙圖﹚神童輝經歷顛狂歲月後，近排專心在家休養。 資料圖片
E-mail：