楊千嬅自從簽約正東唱片之後，是非一籮籮，既傳她與同公司的陳慧琳（Kelly）爭寵，又說她抄鄭秀文（Sammi）形象，學對方藉拍電影發圍，總之她的是非新聞，總與兩位樂壇天后分不開。
記： 你同陳慧琳係咪一山不能藏二虎，爭做正東一姐？
楊： 姐前姐後三分險，好驚㗎！呢排拍電影有人嗌我做千嬅姐，真係跪低，《洪興十三妹》至會有阿姐㗎嘛。我冇計較過做唔做一姐，每間公司都有好多藝人，每個藝人都賺錢就最有福，大家都會分多啲錢。
記： 你唔想做一姐咩？
楊： 我人生嘅最大目標唔係做一姐，係要有首家喻戶曉嘅主題曲、轟烈嘅演唱會，有代表自己嘅嘢就夠。Parco以前問過我有乜目標，我話如果有日到四十幾歲，我重好鍾意唱歌，唔使排場㗎啦，唔知有冇人肯同我辦十場《名曲滿天星》呢？Parco以為我癲咗，但我真係想咁喎，做到甘草歌星，呢啲唔知係咪叫野心呢？
記： 你唔恨做一姐，咁你最想以邊個做榜樣？
楊： 最近似我嘅性格同感覺，係仙杜拉，佢永遠好開心，又新潮，佢可以將《帝女花》改做Rap版，犀利呀。
記： 以前啲人覺得你個樣似Sammi，後尾話你唱歌、形象同拍戲都學晒佢，你點睇呢？
楊： 呢個話題對報界有貢獻囉，哈哈！由我出道到𠵱家都講緊，是但啦，又唔係攻擊性。我出第一張唱片時，已經有人話我似Sammi，𠵱家冇人話我唱片似佢啦，萬事起頭難，企喺咁嘅環境下，啲人重肯攞幾十蚊消費，唔會有人鍾意睇copy。
記： 成日俾人話你似Sammi，唔煩咩？
楊： 以前我會驚人哋嬲，但一年一年咁做落去，就唔使理，人哋講呢個話題算好，比呢個更甚重有，唔會厭惡呀，我知自己唔係就得。
記： 有報道話你同吳彥祖出席《新紮師妹》慶功宴嗰晚，你話請客，但畀錢時就適時地暈低咗，搞到變咗吳彥祖畀錢喎！
楊： 我睇完呢單新聞都好愕然，因為唔係咁嘅一回事，嗰日係我book一個地方開幾圍請大家食飯，唔係用楊小姐，係留名楊千嬅book成個場，嗰晚我哋成班人好開心，不停敬酒，所以飲多咗，重係個製片車我走，吳彥祖好心幫我畀咗錢先，第二日清醒番，我即刻跟進件事畀番錢人哋，唔知點解啲雜誌咁寫，我算孤寒就冇人大方，無論如何，我多謝吳彥祖。
採訪當日，筆者向千嬅提起她一件發生在六年前的瘀事，當年初出道千嬅，在沙田新城市廣場噴水池的舞台上表演，一曲唱罷，她竟當眾叉錯腳，噗一聲墮進水池裏。千嬅全身濕𣲷𣲷從水池爬出來後，只自顧自的在台前笑着走回台後。
千嬅說：「我記得嗰日係我第一次唱現場，自己跌落水之際淨係識笑，唔知係咪因為咁，自此啲人就話我係大笑姑婆。我重要賠番支咪畀無綫，成萬五蚊呀。」但一次失足，令到千嬅日後走每一步，都更加小心。