美股連跌兩日，港股就連升5日，恒指噚日再升35點，收報11252點，成交接近百億元。市傳有基金換馬投入債券市場，加上現時嘅升市，主要受到部分基金追捧落後股所支持，動力有限，下周料轉趨牛皮。不過由5月至6月，市場會炒QDII概念，所以留心細價國企股。第一上海（227）及申銀萬國（218）兩隻國內證券股，噚日分別下調6.7%及3.5%，可以趁低吸納。
36.com（8036）配售嘅32億股開始陸續上板，每股配售價為1.6仙，股價壓力亦愈來愈大，噚日下挫26.3%，收1.4仙。聽講有人最終會炒番上1.6仙水平，就算推唔到上呢個水平，都會私下向承配人買番批貨。
新海能源（342）傳出泊到中石油（857）呢個大碼頭，獲中石油旗下公司批出若干天然氣業務嘅承辦合約，中石油重隨時會成為新海嘅策略性股東，受此消息刺激，股價急升12.6%。
tom.com（8001）又傳出話有收購行動，不過tom近期已經頻頻收購，所收購嘅資產又冇咩新意，都係一啲濕濕碎碎嘅媒體業務，規模又唔大，因此市場對呢種收購已經唔感興趣，加上股價已升至4元強大阻力位，噚日股價已欠缺動力。
國泰航空（293）噚日又見有基金追捧，單日成交達2億元，近期罕見。有芬佬話，客運量與貨運量俱升，加上閒置飛機將投入營運，只要油價唔再升，國泰好快見15元。 阿虎