阿松噚晚出席香港保險業聯會周年晚宴，地點喺金鐘港麗酒店大禮堂。
阿松一入酒店門口，八方就見到有位着住貼身旗袍嘅靚女，親手幫阿松戴上襟花。雖然阿松一直笑容可掬，但過程就唔係好順利，拮咗好耐，有位保險業聯會負責人重在旁不停地說：「唔好拮穿司長件衫！」終於搞掂，阿松件西裝外套都係難逃穿窿之劫。
原來好戲重在後頭，到大合照時，企正中間嘅司長一臉痛楚，掀起外套唔知講咗句咩。攝影師同一班貴賓即時手足無措，隔得老遠的記者原本都唔知發生乜事，又係多得阿松身邊嗰位保險業聯會負責人，大大聲話：「吓！拮親司長？」原來副襟花唔止拮穿阿松件衫，重拮到入肉，阿松都算忍得。不過可能太痛，重爭少少影完相就冇事，佢都無辦法忍埋落去，結果要動用兩個人幫佢重新拮過襟花，阿松先再次露出招牌笑容，影埋張騎騎笑大合照。
（圖）有靚女幫手戴襟花，阿松就算被拮親都要保持風度強忍。
E-mail：