嚟緊5月美國科幻片大戰將會一觸即發，《星戰前傳2》同《蜘蛛俠》電影都會先後上映，一個多Fans支持，一個夠型仔，雖然「大能」同「蜘蛛感應」邊樣勁啲就未知，但蜘蛛俠嘅電影玩具就早一步齊集登場。除咗Figure之外，產品中最正係電動玩具同水槍，啱晒唔同年紀嘅朋友。
記者：張穎倫攝影：楊錦文
劇中主角PeterParker「彼得」因在一次學校嘅科學實驗中，意外被一隻變種蜘蛛咬到，醒咗之後就發現自己擁有特殊能力SpiderSense「蜘蛛感應」，既可以感應危機，又能飛簷走壁非常厲害。由於彼得自少就有警惡懲奸嘅志向，令佢決定要利用自己嘅特殊能力來維護治安保護人類。與GreenGoblin等壞蛋變種人周旋到底。呢次蜘蛛俠電影採用咗大量電腦特技，絕對係電影界焦點所在，5月3日美國、香港同時公映。
可能今次蜘蛛俠電影中各個角色都有型有款，再加上911事件後，唔少人都希望有大英雄出現，所以好多人都睇好《蜘蛛俠》多個《星戰前傳2》。以日本為例，大熱玩具雜誌《HYPERHOBBY》嘅5月號，都搵蜘蛛俠做封面，再加頭條介紹。相反星戰嘅C-3PO就匿喺封面角落頭兼細細張，真係慘情。
銀線蜘蛛俠四圍爬
近年Figure大熱，所以今次蜘蛛俠嘅12吋Figure都畀足心機。整件產品中，小記覺得最正係蜘蛛俠衫身上嘅網紋圖案，跟足電影版採用銀線設計，有別於漫畫版嘅白線。而且為咗配合身手敏捷嘅蜘蛛俠，Figure上嘅關節位特別靈活，可除面具之餘，連手指都可做出射蜘蛛絲嘅動作，方便大家擺出各種飛簷走壁嘅姿勢，夠晒好玩。
售價：$139.9（玩具反斗城）
＊後日有售
5吋吸塑公仔雖然冇12吋Figure咁靈活，但主打戲中不同場景擺設，有齊布景道具，配件齊全。其中未換衫嘅主角彼得柏加，有齊書房大書櫃、相機、眼鏡、背囊各樣配件。最特別係背囊裝水之後，公仔隻手可以射水，用嚟整蠱朋友最正。
售價：$59.9（吉之島）
由漫畫到電影，綠魔嘅座駕飛船絕對深入民心，今次變成電動玩具，唔單止造型靚，最好玩係會郁會叫。只要按下手柄上不同按鈕，飛船便會360度旋轉飛行，又會發射飛彈，更有埋機關槍同綠魔嘅奸笑聲，帶住佢周圍飛勁有第一身感覺，小朋友必定鍾意。
售價：$179.9（玩具反斗城）
炎炎夏日，小朋友最喜歡到海灘玩水槍，呢支蜘蛛俠水槍長近3呎，又可以用手柄加大水壓，容量更高達2加侖，絕對可以當水炮用。再配埋肩帶放上膊頭有姿勢有實際，小朋友用佢打水戰必定贏硬。
售價：約$150-$200（玩具反斗城）
＊4月尾發售
想試吓你同蜘蛛俠有幾合拍，就一定要玩呢個蜘蛛俠飛越垃圾桶嘅吸塑玩具。蜘蛛俠嘅肌肉感做得好真，垃圾桶上色亦唔馬虎，單睇外形已經唔錯。最好玩係按下垃圾桶蓋，就可以令蜘蛛俠打空翻，掌握得好的話佢就可以瀟灑着地，但一有失手，蜘蛛俠就會頭先落地撞到傻。
雖然佢周身軟腍腍兼只得4吋高，而且全身只得一種顏色，外表一啲都唔吸引，但就非常好玩。事關佢嘅軟膠黏力特強，能夠周圍掟、周圍貼，貼喺櫃上又會慢慢碌落地，過程勁似蜘蛛俠喺大廈爬落嚟，非常搞笑。不過就切忌貼佢上乳膠漆牆上，以免將乳膠漆黐落嚟。
售賣點：
玩具反斗城（27309462）
尖沙嘴海運大廈地庫032號舖
吉之島（28846888）
鰂魚涌康怡廣場南座地下