鄭伊健最近接咗一套日劇《香港明星迷》，噚日就喺尖沙嘴海景嘉福酒店開記招。
今次伊健接拍呢個日劇，係東京電視台製作嘅，佢飾演一個香港歌手，遲啲重會拍一場有一百個fans嘅迷你演唱會嘅場面，到時伊健就會安排自己嘅fans出席，順便當係歌迷聚會。
原來伊健今次重係同佢個日本偶像藥師丸博子同場演出，而三個日本演員包括藥師丸博子、室井滋同山本未來，就係扮伊健fans。
伊健話：「好開心可以同偶像藥師丸博子一齊做戲，佢係我年輕時代嘅偶像，我十幾歲時重放佢張相喺我銀包度，今次我重搵咗個朋友班隻藥師丸十幾年前嘅CD返嚟，特登攞畀佢簽名。」
此外，室井滋自言好鬼信風水，今次嚟香港拍劇，都係因為香港風水旺佢喎！
李蘢怡（Tiffany）日前出席譚詠麟（阿倫）嘅歌迷聚會，一名阿倫嘅日籍歌迷衝上台向偶像索取口中嘅香口膠，即時遭到工作人員制止。
對於Tiffany被指駝背，阿倫話：「呢啲生得出冇得變，好自然啫，應該挺起胸膛做人，我覺得呢個女仔好有潛質。」而Tiffany就話：「（駝背）我都唔想，啲人以為我好enjoy，其實邊係。」
樂基兒近排去咗日本做Suntory烏龍茶代言人，佢重同隻機械熊貓仔AIBOLATTE一齊拍咗個電視廣告。佢前日帶埋隻熊貓拍檔，出席喺東京舉行嘅記者會，佢揸住樽烏龍茶好開心咁話：「第一眼見到隻機械熊貓已經好鍾意佢，拍廣告嗰陣，真係好似同真嘅動物一齊咁呢！」
樂施會大使陳寶珠同兒子楊天經噚日為樂施會遠赴桂州，探訪當地貧窮嘅小朋友。
楊天經話：「今次係我第一次同媽咪去做呢啲探訪，好有意義，我哋帶咗啲藥物、蚊怕水同埋餅乾，幫到幾多得幾多。」
陳芷菁噚日喺亞視錄影《群雄奪寶》，見到芷菁容光煥發，問佢點解咁開心，佢話：「可能因為我喺十二月皈依我佛，乜嘢事都學會隨遇而安，個人開心啲，運氣自然會好啦！咁當然唔少得愛情滋潤啦！而我最近傾緊續約嘅嘢，都幾好，機會都幾大㗎。」
無綫總經理何定鈞，同外事部及節目部總監陳志雲前日齊齊升職。原本何定鈞係業務總經理，𠵱家就升為集團總經理，管埋電視廣播國際有限公司（TVBI）嘅業務。
至於陳志雲就升為助理總經理，跟黃應士同鄭善強平起平坐，重掌管埋外事部同節目部。