亨達（111）公布業績前，股價曾由70仙水平質到落47.5仙，結果公布業績，盈利大跌76％。其後股價又升返上去．噚日成交雖然唔大，但升幅有成11.8％，收57仙。
經紀陳話，呢排特別多大陸佬落香港買證券行，好似噚日急升然後停牌嘅萬勝（376）咁，外間就傳有中資洽購。亨達上次賣畀台資凱基證券唔成後，市傳繼續有人希望收購亨達。
佢重話，亨達向來股價都企得好硬淨，上次急跌應該係有個大戶沽貨所致，但好似已全部收番齊。雖然公司盈利大跌，但都叫做賺緊錢，兼且有息派。
加上萬信（555）賣盤個價都叫做唔錯，所以亨達股價冇理由咁殘。理論上，股價重有上升空間。
另外，外資行瑞銀上次喺自然美（157）一役發神威，今次佢推薦本地工業股毅力（332），話睇4.06元。小初即管睇吓佢今次支笛靈唔靈。 慕容小初