盛傳董建華有意籌組「空降兵團」入政府做部長，眾多商界精英頓時人氣急升，連內地傳媒都對香港富豪第二代才俊都刮目相看。
北京官方全國發行嘅刊物《中華英才》最近出版一期，就用咗新世界集團嘅第二代掌舵人鄭家純做封面人物，標題叫「鄭家純『新世界』與祖國同行」，好不威水。
八方細睇內文先知個訪問係由北京千里迢迢透過視像電視屏幕進行。不過記者喺文章開頭嘅採訪手記中呻咗兩句，話因為鄭公子將鄉音同普通話夾雜一起，結果有時要聽幾次先聽得明。
成篇訪問大半係講新世界喺內地嘅生意業績，鄭公子坦言，新世界喺國內嘅好多投資效益都唔係幾好，因為眼光唔好，時機選得唔好，佢話新世界入大陸早咗六、七年，投入咗三、四億港幣，如果呢筆錢留喺香港，早就翻幾番，但𠵱家計吓數損失大概超過一千億元。
唔知係咪呢排澳門賭牌件事，內地記者都知道佢伯爺鄭裕彤原來係賭場大股東，於是問鄭公子係咪成日去澳門？但鄭公子就話唔去澳門賭場，平時玩吓啤牌重可以。
E-mail：