PS2推出咗咁耐，相信好多人都喺度期待着一部可以玩到所有區碼遊戲嘅PS2主機出現！
前排有傳歐版嘅PS2終於有IC破解到遊戲區碼鎖，而喺上星期尾，香港終於有行家抵唔住誘惑，引入全港首部可玩全區遊戲嘅歐洲版PS2改機，不過索價就感到略貴，大約$3,500至$3,800左右！
經鐵人初步測試，發現呢部改機基本上可以直讀所有地區嘅原裝Game碟，試玩時亦算幾順暢，不過經此一改之後有幾傷機，會唔會令部機縮短壽命，咁就要睇耐啲先知啦！
近排Game場真係靜得好緊要，好似PS2同GAMECUBE呢啲主流機，要等到暑假先有大作推出，搞到場內不論大舖細舖，都大喊生意難做。
而喺呢個冇大作出嘅日子裏面，好多Game舖老闆都話只有靠賣吓周邊配件嚟「釣下鹽水」！跟據以往經驗所得，PS2同GAMEBCUBE啲大型主機嘅配件一向都係賣唔得多，反而一啲手提遊戲機嘅配件，種類就多到好似手提電話一樣，所以呢期好多舖頭都係靠賣吓GBA配件嚟維持生計，好似今個星期就一口氣有十幾款新配件推出，當中淨係機套同光燈都有成六、七款，如果想同自己部GBA裝身，𠵱家落場整係時候啦！
香港Game場有一句行頭語，所謂「五窮六絕七翻身」，意思即係5、6月生意就最差，但大概到7月生意又會好番好多！不過由於今年香港經濟市道唔好，呢種「窮」嘅現像，竟然提前係4月中已經出現！搞到好多舖頭都嗌哂救命！
由於市道表現咁差嘅關係，最近Game場有某批發商竟玩起「跳樓式清貨」，希望刺激大家嘅消費意欲，當中最抵買嘅首推《VirtuaStriker3》同《SuperMonkeyBall》，二百蚊多啲就有交易，其他好似《LugiMansion》同《WaveRace》就一百五十蚊左右，全部都係GC嘅遊戲，以咁嘅價錢買一手正Game，真係賤物鬥窮人。
文：打機鐵人