恒指噚日低開51點，早段最多跌過82點，其後反覆回升35點，收11252。恒指噚日雖然只係微升35點，但在連升4日，累積升幅逾5百點嘅情況下，仍能回升，加上成交增加至近99億元，反映買盤動力保持強勁，承接力佳。
港股本周連升5日，共升542點，升幅5%。走勢出現轉機，主要係美國經濟持續復甦，但無通脹壓力，息口短期唔會上升，對香港經濟有利。地產股近日升勢凌厲，外資行轉軚唱好，主要亦係5月加息壓力獲得消除。
睇番港股噚日走勢，如果美股能夠配合，恒指下周升破11400機會相當大，所以手上嘅長實輪9063及恒指輪9045仍然揸住，不過止賺位就分別推上0.49元及0.22元。
多間中資股公布業績欠佳，影響國企股走勢。重慶鋼鐵（1053）走勢先高後低，跌至20日線1.13元獲支持反彈，最後跌1仙，收1.15元，重鋼只宜出現向上突破時才追入，噚日先高後低，走勢反覆，未有明確方向前，須再行觀察。上海置業（1207）下周四公布業績，春江鴨近期已見活動，可留意。 趙飛雲