踏入四月中，到處都可以搵到芒果嘅蹤影，種類至少有四種以上，Size有大亦有細，梗有一款啱大家，今年更多咗一款鹹腰芒選擇，齋食或用以煮餸都同樣美味可口。芒果入饌，清爽而又甘香，以下係幾種唔同芒果嘅食法，有興趣不妨跟住做，全芒果宴自食或招呼親朋都咁得體呢！
記者及示範：陳冰麗 攝影：陳盛臣
嚟自菲律賓嘅呂宋芒係眾多芒果之中最受歡迎及最普遍嘅一種，佢皮薄、果肉飽滿，食味甜芳香，而且價錢經濟。今年更提早三月已上市，價錢只係三個零至四蚊一個。成熟嘅呂宋芒就咁食或取肉攪成果醬拌以任何肉類食都非常清爽。
水仙芒多嚟自泰國，佢比呂宋芒略大，Size較尖長，色澤雖然青綠，但食味其實都好清甜，而且較為清香，皮薄果肉較淡色及實淨，所以將佢切條炒就較適合。
除咗呂宋芒、水仙芒，呢段時間，腰芒亦係熱賣之一。腰芒有分白花及紅花兩種，白花腰芒多嚟自菲律賓，食味非常甜，係眾芒果之中最好食嘅一種，但亦係最貴嘅一種，每磅要二十零蚊，約有七、八個，暫時市面較少。家陣搵到嘅則多嚟自大陸嘅紅花腰芒，價錢較經濟，十零蚊磅，質素都唔錯，食味甜，果肉亦帶香，唯一缺點係果肉較黐皮，但核就非常薄，果肉橙黃色，由於Size較細個，最好將佢切粒做果凍或甜品。
新鮮腰芒醃製過後就係呢啲鹹腰芒，Size最細，佢嚟自中國，比鮮貨更抵食，一包約有十五個，果皮青綠色，果肉酸甜又略帶鹹，無核可連皮食，作為餐前開胃小食都唔錯，除此之外，更可以將佢切絲炒肉，作為夏日清爽餸菜。
有嚟自澳洲及台灣，Size係五種芒果中較大型嘅一種，一個接近兩磅重，價錢亦較貴，其果肉橙黃色，係最甜嘅，味道清香，有清香嘅蘭花味。六、七月係佢盛產期，暫時市面只有少量貨源，部分大型果檔或超市至搵到。六、七月最當造。
呂宋芒4個 大蝦4隻
沙律醬適量 蘆笋少許
1.取3個芒果去皮，起出肉，放攪拌機內攪碎，然後加入沙律醬拌勻，備用。
2.大蝦洗淨，剝去殼，挑去腸，加少許鹽、胡椒粉拌勻，蘸適量生粉，放滾油中炸至金黃色，取出瀝乾油，拌入芒果沙律醬。
3.另一個芒果則起出肉，切粒，撒上蝦面即完成。
4.蘆笋洗淨，以油鹽水灼熟，伴以蝦同食。
論色澤及賣相，呢個香芒黃金蝦都攞足分，好吸引，令人不禁口水流。炸過嘅大蝦，拌以混和咗鮮芒醬及沙律醬做成嘅醬，食落分外惹味。
鹹腰芒3-4個
雞髀肉2隻
車喱茄適量
薑少許
調味料：
油少許
鹽1/2茶匙
糖1/4茶匙紹酒
胡椒粉各少許
1.鹹腰芒切條；雞髀肉洗淨，切絲，加調味料油、鹽、糖、紹酒、胡椒粉一同拌勻略醃5分鐘。
2.車喱茄一開二；薑去皮，切絲。
3.爆香薑絲，放入雞髀肉略炒，加入鹹腰芒再一齊炒，灒少許紹酒，加入車喱茄拌勻即可。
炎炎夏日容易食慾不振，餸菜如果再係肥膩，更加係無晒胃口。呢款鹹腰芒炒雞髀肉酸甜惹味，不肥不膩，絕對適合作為夏日餸菜。
腰芒8-10個或水仙芒2個
大菜絲半包 砂糖適量
1.腰芒去皮，一半取肉切粒；另一半則起出肉，拌以少許砂糖攪碎成芒果醬備用。
2.煲滾約4碗水，加入大菜絲以慢火煮至溶，邊煮邊攪拌，然後加入砂糖煮至溶解。
3.先將適量芒果粒放入杯內，再倒入煮溶嘅大菜，待凍，再放入雪櫃雪至凝固即可以，伴以芒果醬同食更為惹味。
芒果做甜品幾時都咁滋味，簡單嘅芒果菜糕，已經可以作為夏日消暑良品，賣相精緻，小朋友必定啱食，開Party或宴客作為甜品，方便又簡單。