紅磡摩天大樓海名軒，繼玩具大王蔡志明購入頂層複式後，市傳日前連掃26至28樓3單位嘅投資者，原來係思捷環球（330）主席邢李囗（圖），唔知係咪買畀佢嘅大明星老婆林青霞。聽講，唔少城中富豪都對該盤好有興趣，要去睇睇咁話。
內地5大富豪之一嘅許榮茂，旗下世茂集團響上海發展嘅世茂濱江花園，舊年9月推出2號樓，好快就賣晒，而舊年底開售嘅3號樓到今年1月都賣清。呢個盤重攞到2001年上海市住宅銷售金額冠軍。
為響應世界地球日，愉景灣將於今個禮拜日搞植樹日，地點為畔峰嘅山坡同蘅峰嘅中央公園，參加者每栽種一棵樹，大會就會捐出500元畀諾貝爾和平獎得主無國界醫生。咁有意義嘅活動，相信愉景灣嘅居民都要響應吓。
美聯物業代理銷售嘅馬鞍山迎濤灣同沙田碧濤花園二期，因銷售成績好，所以獲發展商華懋集團頒發首季「迎濤灣銷售總冠軍」，同「碧濤花園二期銷售總冠軍」。
蘭西