馬主H位公子去年入咗美國一間著名州立大學，入學未久，間大學已經有信畀馬主H，恭喜佢做咗一個名校學生嘅proudparents，值得捐錢畀學校，以示慶祝。馬主H心諗：「個仔都未畢業，學校咁快就打我心口？早唔早啲呀？」
美國大學對爭取捐款，如水銀瀉地，無孔不入，乜嘢名堂都可以鑿水。相對嚟講，香港啲大學就比較含蓄，只係由校長向有錢人家游說，搵到幾多就幾多，與美國大學啲爭取捐款嘅方法，組織、滲透、韌力，真係相差好遠，應該急起直追。
師弟W間公司每年都有捐款捐獎學金畀幾間大學，作為社會形象建設嘅標準動作，佢不久前接到科大公關部一封信，請佢出席四月十八日一個「捐款人招待會」，本來佢冇乜時間喺下午五點趕到入科大，但睇真吓封信，話明朱經武校長會親自向每一位捐款人（donor）致送紀念品，即係每位捐款人有機會同諾貝爾獎得獎人影番一幅靚相啦，一念及此，即刻應承親自到科大一行，師弟W話：「其他大學好似冇呢招喎，朱經武來自美國，識得利用自己嘅吸引力，諗得幾周到。」香港得一個諾貝爾獎得主做校長啫，其他大學諗到都冇用，兼且美國人（朱校長）對爭取捐款最為開放，唔講架子，肯放下包袱，其他大學以後爭取工商界捐款，科技大學係一大勁敵。