日本Japan
上星期踏足現正步入初夏嘅沖繩，預備打大赤勒同㗎妹嬉水一番之際，竟然落雨！不過，完全無破壞本少爺嘅興致，因為我發覺即使留喺沖繩縣近郊、面向東海嘅HotelNikkoAlivila歎世界一樣咁舒服，從高處眺望無邊際嘅東海，就算喺淺灘都會清澈到睇到海底下綠油油嘅海草，或者喺洞穴餐廳叫杯咖啡，細聽洞外老天為你演奏嘅雨中交響樂，又或照樣喺室內泳池展露一身肌肉，繼而番上房來個長眠，未嘗唔係另一個偷閒之旅。
記者、攝影：朱維達 鳴謝：縱橫遊、日本觀光振興會
據說日本人選擇旅遊嘅地方會有一個習慣，如果有錢有時間，就會飛去夏威夷歎世界，有錢無時間嘅，就會揀沖繩。確實，沖繩除咗擁有夏威夷嘅陽光與海灘，距離鹿兒島亦只係45分鐘機程（香港直航亦只係兩個鐘），真係重快過入大嶼山。不過自問今次去沖繩並非最好時候，因為4月是當地雨季，你可以選擇5月份一遊，不過5月底你就要走喇！因為5月底至6月又輪到沖繩嘅風季，7至8月則是當地旅遊的旺季，下次Plan去沖繩玩就唔好好似我咁Stupid啦！
幸好，今次即使天公不造美，我仍然搵到個安樂窩，住響距離沖繩市約20分鐘車程、近郊且沿岸的HotelNikkoAlivila，雖然說到交通工具，的士是不二之法，但亦由於這個與世隔絕的酒店，度假Feel十足。
記得第一晚入到酒店，不知幾肚餓，心諗呢度咁荒蕪，夜麻麻要喺酒店食飯，一定貴到嘔，最慘嘅就係我身上只得一萬円，要留多兩日，唔通要與杯麵共度餘生？好彩得到導遊哥哥推薦，嚟到地下一間叫佐和嘅日本料理，比起香港唔係真係好平，但勝在由兩位正宗日本料理師傅即切即製，3,800円畀你任叫任食壽司，而且優惠直至6月30日，我就叫咗近二十客，真係抵到嘔！
預約電話：（81）98-9829111（內線：6320）
本來想番上房沖番個靚涼，但係路過一間以山洞做布置嘅餐廳，又好八卦咁竄咗入去，見到高朋滿座之餘，重見到一位老伯伯，攞住一個類似二胡嘅物體講故事，雖然唔知佢噏乜，但係就引到在座食客捧腹大笑，繼而重即席演奏（當然又係唔知佢唱乜啦！），不過最吸引嘅莫過於係裝修，不規則嘅巖石布置特別之餘，你更可以從酒店嘅室外泳池一直游到餐廳內，叫杯嘢飲再游過，認真有諗頭！
預約電話：（81）98-9829111（內線：6360）
第二日，唔再理天氣有幾陰沉，照樣進行我嘅水着之旅！去到一個室內男女共用Spa，甫進去便見到羅馬式的大圓柱建築，重以為係普通貨色，據說原來浸在三種水壓的噴水器前，除了可以消除疲勞，重特別對肩膊、腰痛有治療功效，水池之外重有提供桑拿室及按摩服務等。
從落地玻璃窗突然見到一絲陽光，當然要即刻着番件衫，飆出去曬番夠本。沙灘外有潛水訓練學校、露天茶座，還有一個小型碼頭，由酒店提供的水上活動亦會由此展開，水上三輪單車、水上電單車、香蕉船、潛水等（酒店更會視乎翌日天氣情況而開辦觀鯨團），就趁太陽伯伯提早收山前玩個夠！
預訂方法：可於每日下午六時前向大堂的登記處報名翌日活動。
查詢電話：（81）98-9829111（內線：6060）
成人：2,000円（約119港元）
小童：1,000円（約59港元）
地址：904-0393沖繩縣中頭郡讀谷村字儀間600番地
電話：（81）98-9829111
傳真：（81）98-9586620
網址：
房租：雙人房StandardRoom13,500円（約802港元）
交通：搭的士由那霸機場出發約60分鐘車程。
簽證： 持BNO、特區護照或CI者均須簽證。查詢：25221184（日本領事館）
旅行團： 五日四夜乘日航往返沖繩旅行團，價錢$5,290。查詢：23688188（縱橫遊）
氣溫： 約20-28℃