相信全港十數萬會考生，現正進入戒備狀態，不眠不休，埋頭溫書，應付下月開始的考試。要喺會考考取好成績，努力溫書當然重要，但亦要有強健的體魄，清醒的頭腦。現向你推介五大溫書好地方，及從營養、中醫同堪輿角度，教你點樣提神醒腦，更能落力溫書。
記者：馮淑玲
1.香港中央圖書館
此處雖然冇自修室，但設有數百張自修枱，有啲重係獨立座位，自處一隅，唔使同人撞手撞腳，放書又唔使就住，算係唔錯溫書點。只不過自修枱無遮無掩，容易被冇公德心市民騷擾，座位亦十分緊張，尤其獨立自修枱經常被佔用，有時想搵個好位都幾難。
同類推介：若果屋企唔近中圖，可以去附近圖書館自修室溫習，好似九龍中央圖書館、沙田中央圖書館等，呢啲阿媽年代溫書好去處，可三五知己約埋一齊溫習，有商有量。但去自修室溫書嘅缺點就係人多，走出走入容易分心，遇有人冇公德心，掛住傾偈同講電話，咁就該煨嘞。
2.藝術中心六樓餐廳
餐廳非繁忙時間冇乜人，好鬼靜，適合學生哥溫書，最正重係有個露台，放咗幾張圓枱，溫書攰得滯，可遠眺灣仔中環及西九龍一帶的景色，立時心曠神怡，讀書都特別易入腦。
同類推介：又一城的PacificCoffee亦係好選擇，內有紅色大梳化，邊呷咖啡，邊溫書，都幾醒神，又唔怕被人趕。若賺咖啡貴，可選擇黃昏過後的麥當奴，人少少，又可以唔使買嘢飲，坐幾粒鐘都幾唔錯。當然去得餐廳溫書，要預突如其來的噪音和騷擾，咁就考你定力同忍耐力，同埋要帶啲錢買嘢食。
3.中大荷花池
若果你好受環境影響，要有書卷氣至溫到書，咁各大學校園就啱哂你，好似中大荷花池附近，綠樹林蔭，有水有花，又有校園氣息，溫起書嚟都特別醒神。
同類推介：城大校園亦有類似花園，小橋流水，景色宜人。而港大的餐廳、理大的平台、科大飯堂及草地等，既可溫書，又可以不時望吓大學校園，加強自己入大學的奮鬥心，隨時會愈讀愈起勁。但喺戶外或冇枱冇櫈，要寫起字嚟，或做筆記都幾麻煩。
4.金鐘香港公園
嗰度都幾靜，又唔使錢，溫到攰，重可以望綠樹紅花，養吓眼，唔驚大近視。
同類推介：鯉魚門、大埔、灣仔和尖沙嘴等的海旁公園，都適合溫書，有些公園重有緩步徑，可以跑吓步，鬆弛一下。但喺戶外溫書，要有心理準備，日曬雨淋，颳起風嚟，會吹到資料周圍都係，隨時重要被蚊叮，不妨帶定蚊怕水。
5.另類選擇
醫院、墳場、機場和火車總站大堂都有人喺度溫書，若果你不怕太過另類，都不妨一試。
米施洛營養中心營養師黃凱詩表示，會考生吸收以下幾種營養，才能醒神減壓：
1﹒五穀類集中思考
澱粉質係人腦主要能量，若缺乏便不能集中精神，容易疲勞，故會考生可多進食複合碳水化合物的食物，好似麥包，糙米飯、穀類食品等，幫助穩定思路，更加醒神。建議每餐食1至2碗飯。
2﹒蛋白質修補細胞
蛋白質內含多巴胺，能提升腦內幫助穩定情緒的血清素，並有助提升思考能力，同時亦可修補因壓力而受損的細胞。奶類食品含高蛋白質。建議每日飲1至2杯（250ml或8oz）
3﹒脂肪補腦
Omega3脂肪酸和Omega6脂肪酸，好似EPA同DHA，係形成腦細胞的物質，對處理資料、溫書和記資料時最有用。主要食物包括三文魚、純味果仁、銀鱈魚和鯖魚等。建議每日進食不多於6茶匙煮食油。
4﹒鐵質增記憶力
有助神經傳遞物質，為製造紅血球的主要成分，會影響注意力及記憶力，可多進食紅肉，如牛肉、瘦肉和羊肉。
5﹒維他命C抵抗疾病
可保護細胞，增強對疾病的抵抗力，幫助吸收鐵質。
6﹒維他命B減壓
會考生喺壓力下會加速身體正常的新陳代謝，維他命B可促進碳水化合物同脂肪代謝，提升大腦血清素水平。可從牛奶、香蕉、肉類及奶類吸收。
營養師黃凱詩建議餐單：
早餐：1杯脫脂奶、1隻雞蛋、2塊全麥麵包、1隻香蕉
午餐：番茄牛肉飯、2碗芥蘭、1個奇異果
下午茶：1杯乳酪
晚餐：三文魚芝士焗通粉、西蘭花、1個橙
香港中醫師公會副理事長陳廣源指，會考生要提神醒腦，家長需配合子女個人陰陽寒熱，如藥石亂投，便提神不成，適得其反。他建議，寒底考生要提神提氣，可食用高麗參、黨參或太子參；熱底考生要健腦提神，就應選用合桃、粟子。會考生想腦力發達，可以形補形，煲豬腦食，而豬𦟌、瘦肉同鷄亦是不錯的選擇。中醫師李甯漢稱，會考生若捱夜念書，虛火上升，感到腦脹、口㷫鼻㷫，可用少量花旗參沖水飲用，滋養寧神。
寒底考生靠參湯
材料：高麗參（3錢）、黨參（5至7錢）、太子參（5至7錢）、豬𦟌（6両）、豬腦（半副）、雞胸肉（6両）
做法：4至5碗水，煲個半鐘後加少許鹽調味即成。若用高麗參，最佳方法是燉2至3個鐘。
熱底考生飲肉湯
材料：合桃及栗子（各約4両）、豬𦟌（6両）、豬腦（半副）、雞胸肉（6両）。
做法：以4至5碗水煲個半鐘，加少許鹽調味即成。
堪輿家蘇民峰教你擺個「考試陣」，等你喺屋企「刨」書時更加醒神：
1﹒東北方放4支泥種植物，如富貴竹。
2﹒西南方放書寫用的筆、毛筆、筆座或四盆水中植物。
要令「考試陣」發揮更大威力，可配合考生個人生肖，將書桌移向有利方向，而考試時，就穿着旺自己顏色的衣服和飾物，腦筋會更清醒（詳見表）。蘇民峰亦指，若屋企空間有限，不能隨便移動書枱，退而求其次，可以在書枱上放四支富貴竹，趨旺文昌，或出門應考時，行向旺自己的方向，都有幫助。