冬笋要喺冬天至當造，但呢款茭笋則要喺夏天至蒲頭，佢係祖國特產，係一種水生蔬菜，啱啱上市無耐，部分菜檔或南貨舖至搵到。茭笋外表雖然青BB，但剝去綠色外瓣後，洗淨切絲或切片煮食不知幾嫩口及清甜，簡單食法可以清炒蒜茸，惹味食法可以搭一件鹹豬肉切片以之同炒，再加埋XO醬調味就更和味，用佢滾湯又得。
$7.5-$8/斤
部分菜檔有售
秋冬盛產梨，鴨嘴梨雖然要喺秋冬至容易食到，但最近我肥師奶喺部分果檔仍可搵到鴨嘴梨嘅蹤影，而且重好抵食，十蚊一份有六個，梨迷要食好趁手，據我所知，食埋今個月，鴨嘴梨將近收尾㗎啦！鴨嘴梨汁多清甜，肉質爽脆，就咁食甚潤喉，配合木瓜、雪耳煲湯又夠滋潤。
$10/6個
部分果檔有售
文：肥師奶