格林斯潘暗示今年內可能唔會加息，即係話香港今年有機會唔加息，就算出年美國加息，香港亦未必一定要跟足，即係話香港重可以喺低息環境下培元養氣，咁樣都冇咁傷。不過油價上升確係大問題，所以如果想做對沖，不妨買定啲中國石油股。港股前日升完302點，噚日又升多126點。
地產股全面大升，唔通市場預期樓市會喺６個月後重拾升軌？係就全港負資產人士都Happy啦。不過，可惜地產股升勢只係淡友平倉，絕非睇好樓市後市發展。淨係睇吓失業率再創新高，大學生唔好好讀書，淨係識先使未來錢，就知道本港樓市冇前景啦。呢一次地產股反彈純粹虛火，所以切莫高追。
高盛噚日無情情叫人買中國移動（941）炒短線，據聞除咗因為首季業績可能表現不俗外，亦可能係中移動收購8省市移動通信網絡就快落實，屆時點都要做上去配股集資。
毅力工業（332）近期四處約見分析員推介業務，市場估佢會集資擴充國內廠房及生產力，此股噚日勁升18％，重上3元以上水平，成交重增加至1.65億元，應該好快就有料到。有消息話，佢搵到個基金入股。
講開配股，勝師貨櫃（716）噚日股價一度抽高至1.40元，但其後市場傳出公司想趁市況好轉抽水，回吐至1.34元收市，升幅收窄至11.7％。市場對佢嘅配股消息咁敏感，若真係配得成，可能會再俾人質。
阿 虎