曾志偉、梁漢文同埋黃泆潼噚日喺西貢拍攝電影《陰陽路十五之客似雲來》，黃泆潼重着咗條吊帶裙嚟整車。
問黃泆潼咁性感，有冇做足安全措施，佢話：「咁梗係有打底啦，咪着普通內衣褲。都唔係好性感，冇乜啫，只係吊帶裙，因為戲入面我嘅角色比較女性化。」
噚日志偉同梁漢文都着板仔褲出現，志偉重踢住人字拖，認真搞笑。問到佢𠵱家係咪做咗梁漢文嘅軍師，佢即刻話：「我哋係好兄弟，好朋友，冇所謂，佢之前打電話畀我，咁喺工作上，我都會幫佢留意吓，你幫吓我，我幫吓你，冇話報答唔報答嘅。」
陳冠希日前被香港figure大師EricSo睇中，幫佢出咗隻搪膠公仔，早前重第一次喺台北書展度賣，每隻賣新台幣一千八百元（約四百五十港元）。但據台灣《壹週刊》報道，呢隻公仔喺台灣嘅銷路麻麻，三千隻賣唔到一千隻，結果賣唔晒嗰啲要攞番香港賣。
吳彥祖日前去咗台灣，宣傳有份主演嘅電影《想飛》。佢接受台灣傳媒訪問時，坦承自己曾經睇過璩美鳳嘅偷拍光碟，不過吳彥祖話睇咗五分鐘就冇繼續睇，事關覺得幾無聊，而且亦冇乜特別，而佢返香港後亦會繼續拍攝王晶監製、以璩美鳳事件作藍本嘅《偷窺》。
韓國女子組合S.E.S前晚喺當地時間約七點幾遇上車禍，慶幸三位成員只係受驚而冇受傷。據報組合當時完成KMTV電視台錄影，於是搭旅行車到下一個錄影場地，途經江南區鶴洞十字路時，被緊隨其後嘅汽車衝撞。唱片公司事後即時取消S.E.S嘅工作，等S.E.S返屋企唞吓同定驚。
吳宇森嘅荷李活新片《Windtalkers》，因為九一一事件而押後至今年六月先至喺美國正式公映。但日前就俾一位自稱美國影評人，兼且係吳宇森嘅忠實fans狂踩。
呢位話已睇過試片嘅影評人兼fans，喺電影網站
谷祖琳噚日到港台錄音，對於近日陳奕迅下體受傷一事表示關心，但就唔會打電話畀佢。而谷祖琳表示以前拍戲都試過受傷，佢話：「有次我要由二樓跳落街，雖然事前我已經着咗條有厚墊嘅褲打底，不過最後都撞到瘀晒。但係我覺得女演員最緊要係保護塊面，至於保護個胸就可以用『鐵奶罩』。」