賓架R住喺「豪園」多年，一向可以望到一啲維海景，自中央圖書館落成後，佢嘅海景就冇咗，所以賓架R對中央圖書館冇乜好感。左丁山就話呢啲嘢見怪不怪，香港地咁細，今日有海景，聽日前面就有新大廈遮晒啦，半山區幾多名廈都只係望到人哋嘅廚房工人房啫！
呢日賓架R請左丁山到柏麗酒店二十七樓食自助午餐。好耐冇嚟過，感覺好好，東望無敵維園景，北望尖東維海，唔錯唔錯。睇真啲，原來維園草地已經全部剷起，有排都未完工，柏麗酒店對面嘅維園，已經蓋好一個大型噴水池，由馬路旁邊直接可以行入去，方便之至。食完飯，同賓架R行過去睇吓，噴水池旁，全部係雲石地面，好滑溜溜，如果落雨或者大風，噴水池旁邊會好濕噃，賓架R話：「公園噴水池使乜用雲石地面，假作豪華呀，貪佢滑咩，小童老人家好易跣親，唔夠安全。」
此乃香港特色，豪宅入口用雲石地面，酒店大堂用雲石地面，話夠豪夠威喎，於是公園噴水池亦用雲石面。走到中央圖書館，亦見到地下用雲石地面，其實圖書館、公眾噴水池應以樸素為主，貪靚做乜吖，啲錢慳番嚟津貼文化藝術活動好過！香港人咪話唔識貨噃，圖書館辦一系列嘅名人學術講座，有鼎鼎大名嘅饒宗頤公、朱經武、勞思光、羅慷烈等等，入場券一早派晒，聽講到時重會在演講室外加設座位、大電視，即場轉播㖭。有咁多人聽饒公等人演講，香港重有啲希望。