北海道盛產海鮮，而且種類豐富，其中一年四季都食得到的雪場蟹，近年更人氣急升，成為新一代蟹王。出名身形巨大，身長達一公尺以上，且味道鮮甜的雪場蟹，想要好好品嘗，非與牠搏鬥一番不可，想食難道要全副武裝？當然毋須如此大陣仗，最近便有日本料理店把遠道而來的雪場蟹煎皮拆骨，由頭到尾，一件不漏地炮製出十款各有滋味的新菜式，何須自己落手落腳咁辛苦？
記者：黃婉冰
攝影：陳智良
要新鮮生猛的雪場蟹，先有資格獲選做刺身，而最常被選用的都是最吸引，亦是最多肉的部分──蟹腳，即叫即劏，剝殼拆骨，將原條蟹肉取出做手握壽司，切記勿加豉油，否則會失去鮮味，食時只需加少許青檸汁將鮮味突出已足夠。若想原原本本嗒真啲鮮甜味，蟹足刺身就最能夠滿足你的要求。
試味報告：蟹肉刺身始終以鮮字行頭，原隻粗大蟹腳啖啖肉，肉質入口有煙韌口感，與蒸熟的蟹肉截然不同，在清香檸汁帶領下，蟹肉本身的鮮甜味突圍而出。
夏日炎炎，對熱食不感興趣，還有這款涼浸浸的蟹凍。外層類似啫喱的物體，是用日本魚膠粉加糖和醋調校再放入雪櫃雪凍而成，啫喱裏面有蟹肉和日本南瓜粒，唔使慢慢剝殼已經可以啖啖肉，最適合想食又怕麻煩之人。
試味報告：外層口感確與啫喱無分別，只是涼浸浸中帶着輕微酸味，味道頗特別。南瓜粒的爽甜與蟹肉、啫喱的口感不一，滑得來有咬口，味道不會太濃，清新涼爽是這款菜的最大特色。
日本人最喜愛以火鍋方式來品嘗海鮮的真鮮味，用海鮮的最佳拍檔，木魚昆布清湯做火鍋湯底，以原隻北海道雪場蟹、生蠔、龍蝦，蜆肉和白身魚如左口魚、銀鱈魚、帶子及各種時蔬、大葱做火鍋配料，除蟹腳外，多膏的蟹殼同樣是其最值錢的部分，必定要試。
試味報告：一大盆海鮮擺在眼前，海鮮捧場客必定興奮，木魚湯清淡的湯味與海鮮鮮甜味很夾，最後當然唔可以錯過所有精華所在的湯底，鮮甜味在湯中。
日本菜中，海膽永遠受女士們歡迎，何解？皆因它有養顏作用，有見及此，師傅精心炮製這款有齊各種養顏食品如新鮮海膽、燕窩、雞蛋和鮮蟹腳的日式蒸蛋，三管齊下，必受女士歡迎。食時將海膽、燕窩和蛋撈勻，每一啖都夠晒矜貴。
試味報告：一啖有齊燕窩、海膽、蒸蛋，蛋香濃兼滑溜，入口即溶，鮮蟹腳肉厚鮮甜，與蒸蛋的火候控制得恰到好處，雞蛋香滑，蟹肉鮮嫩，兩種口感同樣吸引。
食得傳統有燒蟹腳，刁鑽的就有這款蘋果酒蟹足燒。蟹腳會先用大廚自家調製的蘋果酒醃上一個鐘，把帶有蘋果酒香的蟹腳放在爐上燒香，就此上枱還未夠，師傅會再補上一個鮮打蘋果茸，讓客人食起來更覺甜絲絲。
試味報告：入口先是一輪蘋果香和酒香，最後蟹肉的鮮味會在兩種味中滲透出來，果味與酒味參半，味道清香有酒味得來不會苦澀辛辣。
蟹身是全隻蟹中最少肉的地方，雖然如此，但都唔可以放過，經過一輪細心拆肉後，加入蘿蔔絲、紅果仔和毛茄，配合鮮甜蟹肉，再淋上與wasabi有幾分似的芥辣沙律醬，加入糖和醋，味道出奇地合拍。
試味報告：芥辣有芥辣的香味但沒有攻鼻感覺，代替沙律醬確有新鮮感。蟹肉夾着沙律菜同食，當然無啖啖肉的感覺，但勝在有菜的脆口，增強口感，蟹肉鮮味亦未被遮蓋。
雪場蟹足刺身$98
＊雪場蟹足壽司$98
蘋果酒蟹足燒$88
蟹燕蛋$88
雪場蟹沙律$68
大吟釀蟹凍$68
冷蟹足$68
＊原味燒蟹蓋$280
鹽燒蟹足$68
漁師鍋$980（四位用）
＊廚師推薦
店名：品川日本料理
電話：28329123
地址：摩利臣山道80-82號地庫（德興火鍋酒家隔籬）
座位：60個
營業時間：中午12時至下午2時半，晚上6時半至11時半。
付款方法：現金及信用卡(Visa,Master)