首位奪得諾貝爾物理獎嘅華人楊振寧，繼日前喺中央圖書館演講吸引超過三百人捧場外，噚日出席中文大學物理系獎學金頒獎禮時，亦吸引近三百名學生爭相攝位影相，風頭一時無兩。非常謙虛有禮嘅楊教授重逐一應學生要求合照，即使八方見到有學生喺排位影相嘅時候撞親佢，但佢都係咪咪嘴笑，一啲都唔嬲。
八方同唔少中大學生傾過，問佢哋對呢位物理學翹楚嘅評價，佢哋個個唔係話「華人之光」、就係話「泰山北斗」，可見佢喺學術界同學生心目中嘅地位確係好高。
重有一樣嘢令班中大生歡喜若狂嘅，就係楊振寧應承中大每年最少嚟講一堂課，唔知到時啲學生要唔要隔夜排隊霸位呢？
（圖）楊振寧（前中）現身中大，吸引大批學生蜂擁而上合照。
E-mail：