BaselFair─一年一度、全球最大型的鐘表及珠寶展，世上最頂級的鐘表都會在為期5日的展覽中出現；Omega─本為希臘文，意思解是SignOfTheExcellence，中文即譯作「完美典範」之意思；當最完美及最大型合埋，肯定會見到最令人意想不到的靚表。馬上就帶大家直擊表壇聖地瑞士，睇睇Omega02年新表。
記者、攝影：馮彥彰
舒密加版玩超大1字
再度推出的全新Speedmaster，單單是特大設計的“1”字及Monogram的格仔表面，又畀唔畀到藉口你買？今次一樣係玩限量：只有11,111隻，加埋佢老人家舒密加簽名喺表後，貴就貴在呢兩個位度。
另一極受歡迎系列：X-33紅帶版，雖然係行Quartz（石英），但係以其精密設計，連美俄的太空人都使用。新加設的特大表面及超過80分貝的響鬧聲，都係其出名的原因。
唔知大家受唔受鑲鑽呢味嘢？有人話過35歲先好戴，同是繼上年最受歡迎的Speedmaster女版系，再加上鑲鑽及鋼面兩種，再將運動及女人加高貴集一身。
Speedmaster相信冇人唔知佢係太空表，當年曾是首隻登陸月球的手表，今次再推出的是係首隻鑲石Speedmaster，表面特別鑲有54顆鑽石，表圈及小時指示上則鑲有32顆，即刻加晒貴氣。最值得留意係表的指針，重現粗線條！
特別在全玩Monogram，更係首次將雙OmegaLogo玩上表度，特別有紀念價值，專為紀念此系列推出50周年而設，而此特別版的男女裝鑲有11粒石，貴在限量同埋加有Constellation50Years字樣。
表面見到是紀念American’sCup帆船比賽，追加Water-resistant去到300m，Chrono及秒針部位重現紅針，追加3303自動上鏈計時機芯及55小時能源儲備，功能及外形可算是同系列最靚一隻。
用上最新的同軸計時，使表齒輪運作時摩擦度減到最低，少摩擦自然唔使成日加油，順理成章機芯保養大大提高，而表的準確性也相對提高。而設計上表帶7行金屬扣改回5行，令人想起50年代Omega的表帶設計，追加100米防水功能，當然也是限量版。
香港代言人任達華首選QuadraChrono，尺寸超大再加Chrono計時，弧形托爪，表身更貼手部。Simon：勁姣！男女戴都冇問題！
1.大表面今年必紅，各大小公司由36mm的表面紛紛推出有成38mm或更大的40mm，當中更不乏有42mm大的表面，咁大隻表完全將50年代的鉈表熱帶回身邊。
2.任達華心水：SpeedMaster石版、金色版CoAxial及紅色的Quadra，一見就話要買畀琦琦。
3.格仔、Monogram同是大熱，而玩Monogram更是今年表界潮流，必入！
4.紀念版及限量都是必搶。而American'sCup及舒密加的「大1版」更是首選。
推薦「月球表」
問設計部總舵主邊隻表必買，「下一個系列將會是我最愛！」真係「行」。不過佢都補講多句：首隻必買的Omega係MoonWatch（即係SpeedMaster）！
睇外國人做展覽，除了認識佢哋做事認真的一方面外，最鍾意係佢哋永無緊張，壓力少啲，生活更舒服好多。不過點講都唔夠佢哋工作完，識得享受的一刻，Omega最後一天完場時，各大公司工作人員出來跳跳舞，癲番一輪，呢樣嘢香港人永遠學唔到。
Omega有咁出名，唔係亂來，除了大把錢賣廣告及找代言人外，最緊要都係有「食力」，下面個列表就畀大家睇到Omega的威水史，單係太陽神13號事件，就足以俾大家感受到一隻表係可以幾重要。
1848 才23歲的路易勃蘭特(LouisBrandt)創立表廠，專做袋表（鉈表）。
1892 示出首隻能報時刻分的手表，只需輕按即可作出響鬧。
1894 公司改名為Omega
1917 第一次世界大戰，英國空軍指定時計
1932 洛杉磯奧運指定時計
1936 刷新倫敦基尤達丁頓(Kew-Teddington)天文台表的精確比賽紀錄，準度達97.8分，到今日都未有人可以再刷新。
1970 戲都有得做的太陽神13號事件，當時由於美國太空總署的錯誤，使太陽神13號在太空失去動力，在全無計時及電力下，面對死亡的太空人，就以唯一的時計，跟地球總署計算出返地球方法，以僅有的動力，帶Omega回到地球，當時手戴的正是Speedmaster。
1980 成功跟SwatchGroup合組，一代老餅從此改以大量代言人及年輕化為售賣點，集功能，勁內涵及靚外表，終有今日的Omega成就。
1995 名模仙蒂歌羅馥成為首個Omega代言人
2000 首間旗艦店在Zurick開張
2001 台灣首間專門店開張，香港據聞亦將會開設