一手樓暢銷，令二手市場受壓，業主為求將單位脫手，唯有加佣畀代理促銷，粉嶺欣盈苑D座低層8室，業主就畀到3.5個佣代理，連埋獎金就有5個佣，結果單位響居屋第二市場以46萬元售出，每方呎893元，係該屋苑首次錄得每方呎低於900元嘅成交。
大發展商為求促銷，好多時都會委託代理收票，中小型發展商就傾向將個盤委託畀代理銷售。均來集團（396）小欖愛琴灣，原來連市場推廣工作都交埋畀代理鴻運地產搞，甚至連樓書都係鴻運負責做，呢類差不多一條龍式嘅服務響內地好普遍，但香港就少見啲，唔知第日會唔會成為市場潮流呢？
由新加坡上市公司IPC集團興建嘅珠海旭日灣花園，上個禮拜響香港展銷，首批108個單位，3日內賣清。發展商明日再推30個海景單位同電梯洋房，海景售價由5萬多元起，洋房就20餘萬有交易，頭28個買家可以獲額外95折，送贈2人2年免費往返香港及珠海直航船票優惠，同全屋家電。
蘭西