陽光衛視（307）近排新聞多多，一來楊瀾退下火線，由佢老公上位；二來又有新收購，跟住重話改名。股價雖然有刺激，但就好似唔多夠力。經紀陳話因為早前配售嘅新股到期沽得，加上隻股以往發得太多股票，街貨太散。
陽光噚日最高見過12.4仙，收12仙，升咗2.6％。
經紀陳話，陽光3月頭，以每股10.5仙，發行10億股新股，呢批新股剛於近日出得街，以現價計，已經有得賺，唔排除有人食胡。
重有陽光喺舊年年底，亦試過以每股10仙，配售6.73億股新股。嗰次新股出街之時，股價炒到13仙水平已經行人止步，10仙認購新股者則成功骨水，所以一路以來，陽光累積唔少蟹貨。由於股數實在太多太散，所以唔好話要炒上，要重返上次高位亦唔易。
噚日唔少股仔上升，就改名做新銀嘅明珠興業（988），升15％，收3.8仙。公司債台高築，最怕新股東會抽水。
慕容小初