想在大陸創業但又怕申請牌照麻煩，可以考慮用加盟形式經營，好像在廣州開一間中檔服裝店，只要攞一個營業牌，便有人代你設計服裝、店舖裝修、準備好貨品等，而閣下所要付出的，便是四十七萬的投資費用，這麼方便的投資，閣下又會否嘗試？
記者：曾順珍
攝影：黃子偉
Mandy現在是廣州世貿中心一間服裝店的老闆娘，之前，她只是在香港的服裝店做買手，間中到大陸製衣廠睇貨。「現在香港嘅經濟唔好嘛，又多裁員又難搵嘢做，其實我自己都係上年十月俾公司裁出嚟，因為搵唔到嘢做，所以我決定自己開舖頭創業。」
在港做買手五年，又經常往返廣州深圳，加上丈夫因工作需要來往中港兩地，她便開始留意廣州的發展機會。
「我知道大陸有個香港牌子DORIANO，但只在大陸開服裝店，佢哋成立咗有九年時間，而且又擁有唔少中產同OL市場，於是就主動聯絡佢哋，希望可以做特許經營。點知適逢佢哋想開一條新嘅YoungLine，而我想新牌子會對顧客有新鮮感，於是就冒險一試。」
這間走年輕路線的DSC賣的衫全是適合OL的時尚服裝，價錢每件大約300多人民幣，款式貼近歐洲時裝風格。
「現在全國大約有十間DSC，除廣州外，還有深圳、成都、武漢、長沙等，而廣州就只得我一間，就算他日總公司要喺廣州再開分店，我都會有優先權決定做定唔做，然後佢哋先可以搵其他新嘅加盟商。」
Mandy話加盟DSC另一好處是毋須加盟費，只需要每季訂貨時預先支付貨款的30%便可，但加盟合約則要每年簽一次，而總公司會視乎加盟商的營業情況才會續約，如以廣州店為例，要每月做上20、30萬的營業額。
由於Mandy開的服裝店是位於廣州的消費熱點──世貿中心，鄰近有友誼商店和花園酒店，所以幫襯的都是中產人士居多。「喺世貿開嘅店舖，大多都係加盟店、個體戶、中外合資嘅高檔商舖，所以喺呢度買嘢嘅人，多數係嗰班人工較高嘅白領人士。唔好睇小呢度嘅人，佢哋嘅消費力高過香港人好多，每次入嚟買嘢，閒閒哋都買千幾蚊人民幣。
「但喺品味方面，佢哋就會比較保守，例如啲吊帶背心，香港女性只會覺得好平常，但佢哋就算只係試身，都會一試完就立刻除番落嚟。而且鍾意嘅顏色比較單調，粉紅色都可以接受，但最多人買都係黑色。」
不過環顧世貿中心，內有多間大型服裝店，如WANKO、EQIQ等，要突圍而出都不是容易的事。
「首先我哋嘅價格屬中等，每件都係?300多，比其他名牌店舖平一、二百，另外我哋會推出貴賓卡，只要喺半年內買夠?1,000，就可以有九折卡，?3,000得八五折卡，而?6,000可得八折卡，務求可以令顧客返轉頭幫襯。總公司唔會收我哋嘅宣傳費，但每季就會同我哋合作搞時裝展，開支預計要萬多人民幣。
由未開過舖頭變為服裝店老闆娘，Mandy回想當初開舖，她覺得最困難除了搵舖位外，便是辦理牌照和訓練售貨員。「當初我搵舖頭都搵咗兩個月，呢度都係同人爭番嚟，因為真係唔熟悉廣州嘅地方，惟有靠總公司幫我周圍搵。」
「國內辦事作風跟香港人不同，好似我去申請牌照咁，辦事員嘅舉止好粗魯，啲人又唔排隊。最慘係佢哋辦公時間好短，晏晝三點半就收工，一個星期又休足幾日，要申請都好麻煩。想搵人代辦嗎，又唔得，因為除咗要帶備身分證外，重要親身到場，絕對唔可以搵其他人搞手續。
「可能我係香港人嘅關係，所以特別容易俾人搵笨，例如我去搵舖位，租金一定會比本地人高，所以一定要搵熟人或當地人幫手先可以。另外廣州人嘅文化同香港人好唔同，有時班Sales講極佢哋都唔明，好似間舖裝修無耐就搞到周圍『花』晒，而啲Sales又唔明你做乜咁錫住啲裝修。重有佢哋有時同顧客傾偈，講吓講吓連人哋嘅私隱都傾埋，但啲客又好似無所謂咁，可能佢哋都好無聊啩。」
剛開業個多月，Mandy覺得雖然盈利唔錯，但還要耐心觀察冬季的銷售情況，她估計約要一年時間才可全部回本，如生意理想的話，她不排除會在廣州再開分店。
廣東啟源律師事務所熊永安律師認為，在內地開任何店舖的服裝店，除要依法申請所需牌照外，最要緊是有風險意識，不要因熟朋友關係缺少辦理應有的交收手續，因為在大陸打官司全講證據，沒有證據就一定會輸。另外不要因貪方便而違反法例，如果給政府查辦就會影響一切的經濟活動，可能損失更大及後患無窮。
Mandy話由於DSC屬連鎖店，而且又有大公司在背後「撐腰」，所以申請牌照手續便容易得多。
1.只需要提供回鄉證、身分證、註冊資金、租約、商舖地址和項目，到那邊的東山區個體工商局，再交?380，便可申請個人工商營業執照。
2.消防及衞生牌照，都是由商場辦理，毋須自己處理。
1.要有最少三年銷售服裝經驗
2.對時裝要有品味及觸覺
3.店舖最少要有500平方呎面積
4.店舖地點要得總公司批准
5.店舖裝修由總公司負責
投資年份：2002年3月
合作人數：1人
投資金額：
租金（3個月按金1個月上期） ?224,000
裝修 ?80,000
入貨 ?100,000
人工（6人） ?7,200
雜項（水電及管理費等） ?4,000
流動資金 ?60,000
總投資額 ?475,200
平均每月營業額 ?214,000
平均每月盈利 ?60,000
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。